رووسیا مۆبایلێکی زیرەک بەرهەم دەهێنت

K24 - رووسیا:

لە میدیاکانی رووسیا، وێنەی مۆبایلێکی زیرەکی رووسی کە بە سیستەمی ناوخۆیی "ROSA Mobile" کاردەکات بڵاوبوویەوە بە ناوی "R-FON"ـەوە.

ڤلادیمێر زیکەڤ، سەرۆکی کۆمەڵەی بەکارهێنەرانی پیشەیی تۆڕە کۆمەڵایەتییەکان، رایگەیاند، مۆبایلە زیرەکەکە شاشەیەکی 6.7 ئینج و رامی 8 گێگابایت و بیرگەی ناوەکی 128 گێگابایتی هەیە. رووکار و تایبەتمەندییەکانی سیستەمی کارپێکردنی لە ئێستادا ئاشکرا نەکراوە.

ئەم مۆبایلە لەلایەن ناوەندی زانستی و تەکنیکی بۆ تەکنەلۆژیای زانیاری " NTC IT" کاری لەسەرکراوەو بەرهەم هاتووە.

زیکەڤ ئاماژەی بەوەشکردووە، بڕیارە لە ساڵی 2024 دا ROSA Mobile  بەردەست بێت و بکەوێتە بازاڕەوە.

بەهۆی جەنگی ئۆکرانیا و سەپاندنی سزا ئابوورییەکان بەسەر مۆسکۆ، رووسیا بڕیاریدا شوێنی کۆمپانیا ئەمەریکی و مارکە بەناوبانگەکان پڕبکاتەوە.

زۆربەی کۆمپانیا و مارکە گەورەکان لە رووسیا کشانەوە و لقەکانی خۆیان لەو وڵاتە داخست، دوای ئەو هەنگاوەش سەرمایەدارانی رووسی بە پشتیوانی حکومەتی وڵاتەکەیان شوێنیان پڕکردەوە، هەروەها شوێنی بازرگانی هاوشێوەیان بە ناوی جیاواز کردەوە، دوای داخستنی سەرجەم لقەکانی KFC"  یەکەم لقی زنجیرەی خواردنی خێرای هاوشێوەی ئەو چێشتخانەیە بەناوی "Rostic" کرایەوە.

هەر لەو چوارچێوەیەدا دوای داخستنی سەرجەم لقەکانی "KFC" لە رووسیا، رۆستیک شوێنی کەی ئێف سی گرتەوە، رووسییەکان دڵخۆشبوون بە هەڵبژاردنی ئەو ناوە، کە ناوی ئەو خواردنگە بەناوبانگەیە کە دوای رووخانی یەکێتی سۆڤیەت کرایەوە و دواتر داخرا، ئەمەش بۆ بەشێک لە هاووڵاتییان وەک نوێکردنەوەی یادگارییە.

هەروەها لە شوێنی مارکەی بەناوبانگی جلوبەرگی "ZARA" مارکەی "MAAG" بەهەمان ستایل و شێوازی جلوبەرگەکانی ئەو مارکەیە کراوەتەوە، بەڕای شارەزایانی ئابووری هەنگاوەکانی رووسیا بۆ دانانی جێگرەوە بۆ کۆمپانیا ئەمەریکی و جیهانییەکان سەرەتای دابەشبوونی ئابووری جیهانە، بۆ دوو بلۆکی رکابەری هەمیشەیی و دۆزینەوەی جێگرەوە بۆ نەهێشتنی باڵادەستی مارکە بازرگانییە جیهانییەکان.