بۆ ئەندامبوون لە یەکێتیی ئەوروپا، بولگاریا پاڵپشتی ھەوڵەکانی تورکیا دەکات
K24 – هەولێر:
وەزیری دەرەوەی بولگاریا، ماریا گابرییل رایگەیاند، وڵاتەکەی پاڵپشتی لە ھەوڵەکانی تورکیا دەکات بۆ ئەندامبوون لە یەکێتیی ئەوروپا.
ماریا گابرییل لە سەردانەکەی بۆ ئەنقەرە لەگەڵ ھاوتا تورکییەکەی، ھاکان فیدان کۆبووەوە و دوای کۆبوونەکەش، کۆنگرەیەکی رۆژنامەوانی ھاوبەشیان ئەنجامدا.
وەزیری دەرەوەی بولگاریا لە کۆنگرەکە رۆژنامەوانییەکەدا ئاماژەی بەوەدا، سەردانەکەی بۆ ئەنقەرە لە کاتێکی زۆر گرنگدایە و گوتی: "وەک وەزیری دەرەوەی توركیا ھاکان فیدان باسی لێوە کردووە، ئێمە رووبەڕووی ئاستەنگ و کێشەی جیددی دەبینەوە، ئەوەش بەھۆی گرژییە جیۆسیاسییەکانەوەیه".
وەزیری دەرەوەی بولگاریا، ماریا گابرییل راشیگەیاند، تورکیا و بولگاریا وەک دوو وڵاتی دراوسێ و ھاوبەش لە ناتۆ لە پێگەیەکی بەرپرسیارێتیدان، بە تایبەتی لە پاراستنی ئاسایش لە ناوچەی دەریای رەش.