رێکخراوێک کار بۆ بەرزکردنەوەی تەمەنی تاوانی سزایی دەدات

K24 – هەولێر

رێکخراوی لێکۆڵەر بۆ سەروەری یاسا رایدەگەیەنێت، "هەوڵدەدەین تەمەنی تاوانی سزایی لە عێراق و هەرێمی کوردستان بۆ 12 ساڵی بەرزبکەینەوە، کە ستانداردێکی جیهانییە".

ئەمڕۆ شەممە، 18-11-2023، پێشەوا حوسامەددین، جێگری رێکخراوی لێکۆڵەر بۆ سەروەری یاسا، بە کوردستان24ـی راگەیاند، "رێکخراوەکەمان بە هاوکاری لەگەڵ رێکخراوەکانی (پا) و (ئێم پی ئەی)ـی نەرویجی و یەکێتیی ئەوروپا، پڕۆژەیەک جێبەجێ دەکەین، تایبەتە بە مافی تاکەکان لە دادگاییەکی کردنێکی دادپەروەرانە".

پێشەوا حوسامەددین گوتیشی، "هەوڵدەدەین هەمیشە تاکەکان دادخواز بن یا تۆمەتبار دادگاییەکی دادپەروەرانەی بۆ بکرێت. ئێمە لە سۆنگەی خۆمانەوە ئەو پڕۆژەیەمان نوسیووە و، خۆی لە کۆمەڵێک چالاکی دەبینێتەوە، لەسەر ئاستی عێراق نەک تەنیا لە هەرێمی کوردستان."

راشیگەیاند، "ئەگەر بەراوردیان بکەی بە توێژەکانی دیکە، نەوجەوان و ئافرەت توێژێکی لاوازن. بۆیە ئێمە زیاتر جەختمان لەسەر ئەو بابەتە دەکەین، بۆ نموونە لە عێراق تەمەنی تاوانی سزایی نۆ ساڵە، لە هەرێمی کوردستان 11ساڵە. دەمانەوێت ئەو تەمەنە بەرز بکەینەوە، بە پێی ئاستی ستانداردی نێودەوڵەتی کە 12 ساڵە".

ئاماژەی بەوەش کرد، "لە رابردوودا کۆمەڵێک چالاکیمان ئەنجامداوە، ئێستاش ئەم کۆنفراسەمان هەیە، کە تێیدا پەرلەمانی عێراق و لەگەڵ د. زێدان خەلەف، راوێژکاری سەرۆکوەزیرانی عێراق، لەگەڵ دادوەران و بەڕێوەبەرانی گشتی، لەسەر ئاستی عێراق هەرێمی کوردستان ئامادەن. بۆ ئەوەی ئامادەی گەنگەشە یاساییەکان بین کە بەچ شێوازێک مامەڵە لەگەڵ نەوجەوانان بکەین، لێڕەدا باس لەوە دەکەین چی بکرێت، بۆ ئەوەی دادگایی نەوجەوانن لە هەرێمی کوردستان باشتر بکرێت".

ئامادەکردن: لاڤین عومەر