حه‌لبووسی: ئاماده‌م بچمه‌ به‌رده‌م دادگا و عێراق به‌جێناهێڵم

محه‌ممه‌د حه‌لبووسی، سه‌رۆكی پێشووی په‌رله‌مانی عێراق
محه‌ممه‌د حه‌لبووسی، سه‌رۆكی پێشووی په‌رله‌مانی عێراق

K24 - هەولێر:

سه‌رۆكی پێشووی په‌رله‌مانی عێراق رایده‌گه‌یه‌نێت، هیچ په‌یوه‌ندییه‌كیان له‌گه‌ڵ ئیسرائیل نییه‌ و گرێبه‌ستێكیان له‌گه‌ڵ دامه‌زراوه‌یه‌كی ئه‌مه‌ریكی كردووه‌ بۆ ئه‌وه‌ی ئاستی سیاسی و رێكخراوه‌یی حزبی ته‌قه‌دوم پێش بخه‌ن، ده‌شڵێت ئاماده‌یه‌ بچێته‌ به‌رده‌م دادگا و راست و دروستی بابه‌ته‌كان بسه‌لمێنێت.

ئه‌مڕۆ (پێنجشه‌ممه‌ 30ـی تشرینی دووه‌می 2023) محه‌ممه‌د حه‌لبووسی، سه‌رۆكی پێشووی په‌رله‌مانی عێراق له‌ كۆنفرانسێكی رۆژنامه‌وانیدا رایگه‌یاند، ئاماده‌یه‌ له‌ به‌رده‌م دادگای عێراقی ئاماده‌بێت و پابه‌ندی هه‌ر جۆره‌ بڕیارێكن كه‌ دادگا ده‌ریده‌كات و یاسا جێبه‌جێ ده‌كه‌ن. گوتیشی، جگه‌ له‌ رێزگرتن له‌ دادگا، هیچ بژارده‌یه‌كیان له‌ به‌رده‌مدا نییه‌.

سه‌رۆكی پێشووی په‌رله‌مانی عێراق له‌ به‌شێكی دیكه‌ی كۆنفرانسه‌ رۆژنامه‌وانییه‌كه‌یدا باسی له‌وه‌ش كرد، ژماره‌یه‌ك له‌و كه‌سانه‌ی سكاڵایان له‌ دژ تۆمار كردووه‌ و ئاراسته‌ی به‌ڕێوه‌به‌رایه‌تی كاروباری پارت و رێكخستنه‌ سیاسییه‌كانی سه‌ر به‌ كۆمیسیۆنی باڵای هه‌ڵبژاردنه‌كان كراوه‌، كه‌سانێكن پێشتر خۆیان دۆسیه‌یان هه‌بووه‌ و له‌ چه‌ندین كه‌یسی گه‌نده‌ڵی و بابه‌تی دیكه‌ی جۆراوجۆر تێوه‌گلاون.

حه‌لبووسی هه‌روه‌ها به‌ پێویستیشی زانی راگه‌یاندنه‌كان به‌ وردی مامه‌ڵه‌ له‌گه‌ڵ بابه‌ته‌كان بكه‌ن، بۆ ئه‌وه‌ی رای گشتی سه‌باره‌ت به‌و پرسانه‌ی په‌یوه‌ندیدارن به‌ ئه‌وه‌وه‌، ئاگادار بن و شتی شاراوه‌یان له‌لا نه‌بێته‌ جێی پرسیار.

محه‌ممه‌د حه‌لبووسی هاوكات باسی له‌وه‌ش كرد، ئه‌و سكاڵایانه‌ی له دژی خۆی و حزبه‌كه‌ی پێشكه‌ش كراون، هه‌رگیز كاریگه‌رییان له‌سه‌ر نابێت و نابنه‌ هۆی ئه‌وه‌ی كه‌ عێراق به‌جێبهێڵن. سه‌رنجی بۆ ئه‌وه‌ش راكێشا، كه‌ هیچ شتێكی شاراوه‌یان نییه‌، بۆیه‌ ئاماده‌نین عێراق به‌جێبهێڵن.

سه‌رۆكی پێشووی په‌رله‌مانی عێراق تیشكی خسته‌ سه‌ر ئه‌وه‌ش، ئه‌وان له‌ رابردوودا واته‌ له‌ ساڵی 2021 و پێشتریش یاسای به‌تاوانناساندنی په‌یوه‌ندییان له‌گه‌ڵ ئیسرائیل واژۆ كردووه‌، ته‌نانه‌ت جگه‌ له‌ دوو په‌رله‌مانتاری سه‌ر به‌ حزبه‌كه‌ی، ته‌واوی په‌رله‌مانتارانی دیكه‌ی سه‌ر به‌ حزبی ته‌قه‌دوم ده‌نگیان به‌و پڕۆژه‌یاسا دا، كه‌ له‌گه‌ڵ ره‌وتی سه‌د پێشكه‌شیان كردبوو.

جه‌ختیشیكرده‌وه‌ ئه‌و رێككه‌وتن و گرێبه‌سته‌ی حزبی ته‌قه‌دوم له‌گه‌ڵ كۆمپانیای ... ئه‌مه‌ریكی ئه‌نجامی داوه‌، سه‌د ده‌ر سه‌د كۆمپانیایه‌كی ئه‌مه‌ریكییه‌ و هیچ په‌یوه‌ندی به‌ ئیسرائیله‌وه‌ نییه‌ و له‌وه‌ دڵنیا بوونه‌  بۆیه‌ش گرێبه‌ستیان له‌گه‌ڵ كردووه‌. روونیشیكرده‌وه‌ به‌ڵگه‌كانیان له‌به‌رده‌ستدایه‌ و هیچ گرێبه‌ستێكی شاراوه‌یان نییه‌.

حه‌لبووسی دووباره‌ی كرده‌وه‌ گرێبه‌سته‌كه‌یان له‌گه‌ڵ كۆمپانیا یان دامه‌زراوه‌ ئه‌مه‌ریكییه‌كه‌ تایبه‌ته‌ به‌ چۆنیه‌تی ئه‌نجامدانی چالاكی و رێكخستنه‌ سیاسییه‌كانی حزبی ته‌قه‌دوم له‌ ئه‌مه‌ریكا و چۆنیه‌تی كردنه‌وه‌ی خولی مه‌شق و راهێنان له‌و وڵاته‌، بۆ ئه‌وه‌ی ئاستی سیاسی و رێكخستنی حزبه‌كه‌یان وه‌ك هه‌ر حزبێكی دیكه‌ پێش بخه‌ن.

بەتۆمەتی ئەنجامدانی گرێبەست لەگەڵ رێکخراوێکی ئەمه‌ریکی و ناردنی پارە بۆ ئەو رێکخراوە کە پشکێکی رێکخراوەکە سەر بە ئیسرائیلە، ئه‌مڕۆ پێنجشه‌ممه‌ 30ـی تشرینی دووه‌می 2023 بە فەرمی داوای هەڵوەشاندنەوەی پارتەکەی محمەد حەلبووسی كرا.

فه‌رمانگه‌ی كاروباری پارت و رێكخراوه‌ سیاسییه‌كانی سه‌ر به‌ کۆمسیۆنی باڵای سەربەخۆیی هەڵبژاردنەکان سکاڵاکەی ناردووە بۆ لیژنەی دادوەری کۆمسیۆن تاوەکو بڕیاری کۆتایی لە بارەوە بدات.

به‌گوێره‌ی نووسراوێك كه‌ واژۆی هه‌یمان ته‌حسین حه‌مید، به‌ڕێوه‌به‌ری گشتی كاروباری پارت و رێكخستنه‌ سیاسییه‌كانی سه‌ر به‌ كۆمیسیۆنی باڵای سه‌ربه‌خۆی هه‌ڵبژاردنه‌كانی عێراقی به‌سه‌ره‌وه‌یه‌ و رۆژی چوارشه‌ممه‌ 29ـی تشرینی دووه‌می 2023 ده‌رچووه‌، ئاماژه‌ به‌وه‌ كراوه‌، پشتبه‌ست به‌ یاسای ژماره‌ 36ـی ساڵی 2015ـی پارته‌ سیاسییه‌كان و له‌سه‌ر سكاڵای هه‌ر یه‌ك له‌ باسم خه‌زعه‌ل خه‌شان، فارس ته‌ها فارس، عه‌بدولستار عادل عه‌بدولستار، حه‌یده‌ر نووری سادق موللا، سوهه‌یب ئیسماعیل مه‌حموود، مسته‌فا مۆفه‌ق جاسم، ئه‌م نووسراوه‌ ئاراسته‌ی لیژنەی دادوەری کۆمسیۆن كراوه‌ بۆ ئه‌وه‌ی حزبی ته‌قدوم، كه‌ محه‌ممه‌د حه‌لبووسی، سه‌رۆكی پێشووی په‌رله‌مانی عێراق سه‌رۆكایه‌تی ده‌كات، هه‌ڵبوه‌شێنێته‌وه‌.

رۆژی سێشەممە (14ـی تشرینی دووەمی 2023) دادگای فیدراڵی بڕیاری کۆتاییهێنان بە ئەندامێتی هەر یەکە لە محەممەد حەلبووسی و لەیس دلێمی لە پەرلەمانی عێراق هێنا و بەمەش راستەخۆ حەلبووسی لە پۆستی سەرۆکی پەرلەمانی عێراق دوورخرایه‌وه‌.

حەلبووسی لە ساڵی 2018ـەوە سەرۆکی پەرلەمانی عێراق بوو، هاوکات سەرۆکی حزبی تەقەدومە. پێشتر و بەر لەوەی ببێتە سەرۆکی پەرلەمان، لە 29ـی ئابی 2017، ئەنجوومەنی پارێزگای ئەنبار بە زۆرینەی دەنگ حەلبووسی کردە پارێزگار.