رێباز محەممەد: کۆمەڵێك پێشنیازمان سەبارەت بە پڕۆژەی رێگای گەشەپێدان بە وەزارەتی گواستنەوەی عێراق دا

kurdistan24.net

K24 – هەولێر:

بەرپرسێکی وەزارەتی گواستنەوە و گەیاندنی حکومەتی هەرێمی کوردستان  ئاماژە بەوەدەکات، ئەمڕۆ شاندێکی وەزارەتی گواستنەوەی هەرێمی کوردستان بۆ تاوتوێکردنی پڕۆژەی رێگای گەشەپێدان سەردانی بەغدا کرد و لەگەڵ وەزارەتی گواستنەوەی عێراق کۆبووەوە. گوتیشی: لەسەر پڕۆژەی "رێگای گەشەپێدان" کۆمەڵێك پێشنیازمان بە تیمی وەزارەتی گواستنەوەی عێراق دا.

رێباز محەممەد، بەڕێوەبەری گشتی گواستنەوە لە وەزارەتی گواستنەوە و گەیاندنی حکومەتی هەرێمی کوردستان، لەمیانەی بەشداریکردنی لە گەشتی دواهەواڵی کاتژمێر 23ـی کوردستان24 رایگەیاند، پڕۆژەی رێگەی گەشەپێدان یەکێکە لەو پڕۆژە گرنگ و هەستیارانەی کە هێڵی شەمەندەفەرە عێراق و هەرێمی کوردستان بە تورکیا دەبەستێتەوە.

بەڕێوەبەری گشتی گواستنەوە لە وەزارەتی گواستنەوە و گەیاندنی حکومەتی هەرێمی کوردستان، دەڵێت: بۆ تاوتوێکردنی ئە پڕۆژەیە سەردانی بەغدامان کرد و لەگەڵ وەزارەتی گواستنەوەی حکومەتی عێراق کۆبووینەوە، ئەمڕۆ کۆمەڵێک پێشنیازمان داوەتە وەزیری گواستنەوەی عێراق کە دەبێت هەرێمی کوردستان لە دەرەوەی پلانی ئەو پڕۆژەیە نەبێت، بەڵکو دەبێت هاووڵاتییانی هەرێمی کوردستانیش سوود لەم پڕۆژەیە وەربگرن.

رێباز محەممەد، گوتیشی: سەرەتای ساڵی داهاتوو شاندێکی وەزارەتی گواستنەوەی عێراق سەردانی هەرێمی کوردستان دەکات بۆ تاوتوێکردنی لەسەر ئەو پڕۆژەیە بۆ ئەوەی هەرێمی کوردستانیش سوود لەم پڕۆژەیە وەربگرێت.

ئەمڕۆ دووشەممە (4ـی کانونی یەکەمی 2023) شاندێکی حکومەتی هەرێمی کوردستان بە سەرۆکایەتی ئانۆ جەوهەر، وەزیری گواستنەوە و گەیاندنی حکومەتی هەرێمی کوردستان و فارس عیسا، سەرۆکی نوێنەرایەتیی حکومەتی هەرێمی کوردستان لە بەغدا لەگەڵ وەزارەتی گواستنەوەی عێراق کۆبوونەوە و پێکەوە باسیان لە لە پڕۆژەی رێگای گەشەپێدان کرد.

رەزاق محێبس، وەزیری گواستنەوەی عێراق لەوبارەیەوە بە کوردستان24ـی رایگەیاند، لە کۆبوونەوەکەی نێوانمان باسمان لە رێچکەی پڕۆژەکە و ئەو پارێزگایانە کرد کە پڕۆژەکەیان پێدا تێدەپەڕێت.

ناوبراو ئاماژەی بەوەشدا، گەڕێکی دیکە گفتوگۆ دەربارەی پڕۆژەکە بەڕێوەدەچێت و بۆیە بۆ ئەم مەبەستە شاندێکی وەزارەتی گواستنەوەی حکومەتی عێراق سەرەتای ساڵی داهاتوو سەردانی هەرێمی کوردستان دەکات. 

لەلایەن خۆیەوە، ئانۆ جەوهەر، وەزیری گواستنەوە و گەیاندنی حکومەتی هەرێمـی کوردستان بە کوردستان24ـی گوت، ئێمە گەیشتینە قۆناغێکی پێشکەوتوو لە گفتوگۆمان دەربارەی رێڕەوی پڕۆژەی گەشەپێدان کە لە فاوەوە دەستپێدەکات درێژدەبێتەوە بۆ ناو خاکی هەرێمی کوردستان بۆ زاخۆ لەوێدا لەو رێگایەوە عێراق و هەرێمی کوردستان بە خاکی تورکیا دەبەستێتەوە.

وەزیری گواستنەوە و گەیاندنی حکومەتی هەرێـمی کوردستان، دەڵێت: ئەم پڕۆژەیە زۆر گرنگە و پڕۆژەیەکی ستراتیژییە، سەرەتای ساڵی داهاتوو کاتێک شاندی وەزارەتی گواتسنەوەی عێراق سەردانی هەرێمی کوردستان دەکات گەڕێکی دیکەی گفتوگۆکان لەگەڵیاندا دەستپێدەکەین و ئێمەش لە رێگەی کەسانی شارەزای خۆمانەوە هەوڵدەدەین بۆچوونەکانی خۆمان بخەینەڕوو بۆ ئەوەی ئەم پڕۆژەیە بۆ خزمەتی تەواوی هاووڵاتییانی هەرێمی کوردستان و عێراق بەکاربهێندرێت.