سه‌رۆكی لیسته‌ر سیتی، سووپڕایزێكی پێشكه‌شی یاریزانه‌كان كرد
سه‌رۆكی یانه‌ی لیسته‌ر سیتی كه سه‌رمایه‌دارێكی تایله‌ندییه، دیاری و خه‌ڵاته‌كه‌ی وه‌رزی رابردووی به‌هۆی بردنه‌وه‌ی نازناوی پرێمه‌ر لیگ بۆ ئه‌مڕۆ هه‌ڵگرت و وه‌ك سووپرایزێك پێشكه‌شی یاریزانه‌كانی كرد.
ئه‌مڕۆ هه‌ینی، 5 ئابی 2016، یاریزانانی لیسته‌ر سیتی له كاتی گه‌یشتنیان به كه‌مپی مه‌شق و راهێنانی یانه‌كه تووشی شۆك بوون، كاتێك بۆ هه‌ر یاریزانێك ئۆتۆمبێلێكی گرانبه‌های جۆری بی ئێم ده‌بلیۆ وه‌ك دیارییه‌ك بۆیان ئاماده كرابوو كه ژماره‌یان 19 ئۆتۆمبێل بوو، له كاتێكدا وه‌رزی رابردوو 23 یاریزان رۆڵیان له بردنه‌وه‌ی نازناوه‌كه هه‌بوو.
ئه‌وه‌ی كه تێبینی كرا بوو، 4 یاریزان كه وه‌رزی رابردوو له لیستی یاریزانه‌كانی یانه‌كه بوون بۆ بردنه‌وه‌ی نازناوی پرێمه‌ر لیگ، به‌ڵام له‌م دیارییه بێبه‌ش كرا بوون، دیارترینیان نگۆڵۆ كانتی كه دوو هه‌فته له‌مه‌وبه‌ر به فه‌رمی بۆ ریزه‌كانی یانه‌ی چێڵسی گواسترایه‌وه.
یانه‌ی لیسته‌ر سیتی وه‌رزی رابردوو به بردنه‌وه‌ی نازناوی پرێمه‌ر لیگ جیهانی تووشی شۆك كرد، چونكه هیچ كه‌سێك پێشبینی ئه‌وه‌ی نه ده‌كرد ئه‌م یانه‌یه مێژوویه‌كی وا گه‌وره تۆمار بكات و بۆ یه‌كه‌مینجار ببێته هه‌ڵگری نازناوه‌كه.