لە هەولێر کەرنەڤاڵی 128 ساڵەی سینەمای جیهانی بەرێوەچوو
K24-هەولێر:
کەرنەڤاڵی 128 ساڵەی رۆژی جیهانی سینەما لە هەولێر سازکرا، هاوکات خەڵاتی ڕێزلێنانیش بە چەندین سینەماکار و فیلمسازی کورد بەخشرا.
ئەمڕۆ چوارشەممە(10-ی کانوونی دووەمی 2024)،شاخەوان مستەفا بەڕێوەبەری هونەری سینەمای هەولێر و رێکخەری کەرنەڤالەکە بە کوردستان24ـی راگەیاند:
خواستمانە لەو ساڵەدا سینەمای کوردی پێشبکەوێت و، بتوانین فیلمی باش بە پاڵپشتی دارایی باش بەرهەمبێنین.
بەرێوەبەری هونەری سینەما رایگەیاند: پارێزگاری هەولێر موژدەی ئەوەی پێداون بۆ یەک ساڵ، هەموو چوارشەمەیەک لە ئێمپایەر سینەمای فاملی مۆڵی هەولێر، نمایشکردنی فیلم بە خۆڕایی بێت، هاوکات ئەوانەی حەز و ئارەزوویان بۆ سینەما هەیە، دەتوانن پڕۆژەکانیان بگەیەننە ئەو فەرمانگە هونەرییە و لە ئاییندەشدا بودجەیەکی دیاریکراو بۆ بەرهەمهێنانی فیلمی کوردی بە سینەما دەدرێت.
لە کۆتایی رێورەسمەکەدا کورتە فیلمی هیتفۆن، لە دەرهێنانی ئێڤار عومەر و نواندنی گۆران بەختیار نمایش کرا و وەک یەکەمین بەرهەمی چالاکییەکانی ئەمساڵی سینەمای هەولێر لە چوارچێوەی ئەم چالاکیە نیشاندرا.