شاندی هەرێم لە میونشن باسی مەترسی میلیشیاکان و درۆن و موشەکەکان دەکات
K24 – میونشن:
ئەمڕۆ یەکەم رۆژی کۆنفرانسی ساڵانەی ئاسایشی میونشنە لە ئەڵمانیا، نێچیرڤان بارزانی سەرۆکی هەرێمی کوردستان و شاندێکی بەشدارن و بڕیارە ژمارەیەک دیدار لەگەڵ بەرپرسانی باڵای جیهانی ئەنجام بدات.
سەرۆکی هەرێم تێڕوانین و روانگەی چارەخوازانەی هەرێمی کوردستان بۆ ململانێ سیاسییەکان باس دەکات.
هەروەها مەترسی هەڕەشەکانی تیرۆر و میلیشیا چەکدارەکان و قەیرانە مرۆییەکانی هەرێمی کوردستان و عێراق دەخاتەڕوو.
کۆنفرانسی ئاسایشی میونشن لە ئەڵمانیا لەساڵی 1963 دامەزراوە و ئەم کۆنفرانسە سەکۆیەکە بۆ وتووێژی کراوەی سەرکردە و بەرپرسی باڵای وڵاتان لەسەر ئاستەنگ و ئاڵنگارییە ئەمنییەکانی جیهان. ئەمساڵ یادی 60 ساڵەی کۆنفرانسەکەش دەکرێتەوە .