شاندێکی دیوانی چاودێری دارایی عێراق گەیشتە هەرێمی کوردستان
K24 – هەولێر:
شاندێکی دیوانی چاودێری دارایی فیدراڵی بۆ مەبەستی وردبینیکردن لە خەرجی و داهاتی شەش مانگی دووەمی ساڵی 2023ـی مووچەخۆران گەیشتە هەرێمی کوردستان.
ئەمڕۆ شەممە (24ـی شوباتی 2024) هونەر جەمال، گوتەبێژی وەزارەتی دارایی و ئابووری هەرێمی کوردستان بە کوردستان24ـی رایگەیاند، شاندێکی دیوانی چاودێری دارایی عێراق هاتوونەتە هەرێمی کوردستان و سبەی لەگەڵ دیوانی چاودێری دارایی هەرێمی کوردستان وردبینی لە خەرجی و داهاتی شەش مانگی دووەمی ساڵی رابردوو دەکەن.
گوتەبێژی وەزارەتی دارایی و ئابووری، گوتیشی: ئەو شاندە سبەی یەکشەممە لەگەڵ دیوانی چاودێری دارایی هەرێمی کوردستان دەست بە وردبینی لە خەرجی و داهاتی شەش مانگی دووەمی ساڵی رابردوو دەکەن کە ئەوەش لە چوارچێوەی رێکارێکی هونەری یاسای بودجەی عێراقە کە سێ مانگ یان شەش مانگ جارێک وردبینی لە داهات و خەرجیەکان دەکەن.
هونەر جەمال، باسی لەوەشکرد، بریارە شاندەکە سەردانی هەردوو وەزارەتی دارایی و سامانە سروشتیەکانی هەرێمی کوردستان بکەن.