مەحموود عگێلی: ئەمەریکا جەخت لە مافە دەستوورییەکانی هەرێمی کوردستان دەکاتەوە

مەحموود عگێلی، ئەمینداری حزبی ئومەی عێراقی
مەحموود عگێلی، ئەمینداری حزبی ئومەی عێراقی

K24 – هەولێر:

ئەمینداری حزبی ئومەی عێراقی ئاماژەی بەوەدا، ئەمەریکا توانای هەیە گوشاربکات تا وڵاتانی دراوسێ دەستدرێژییەکانیان بۆ سەر هەرێمی کوردستان رابگرن. هەروەها دەڵێت: ئەگەر حکومەتی فیدراڵی پابەندی پەیامەکانی ئەمەریکا نەبێت سزای دارایی بەسەردا دەسەپێندرێت.

ئەمڕۆ شەممە (2ـی ئاداری 2024) مەحموود عگێلی، ئەمینداری حزبی ئومەی عێراقی، بە کوردستان24ـی راگەیاند، ئەمەریکا رۆڵێکی گەورەی هەیە و وڵاتێکی زلهێزە و دەتوانێت ئاڕاستەی سیاسی و هەڵوێستەکان لە عێراق بگۆڕێت.

ئەمینداری حزبی ئومەی عێراقی، لەبارەی سەردانەکەی سەرۆکی حکومەتی هەرێمی کوردستان بۆ ئەمەریکا دەڵێت: پێموایە ئەمەریکا لە رێگەی پێشوازیکردن لە سەرۆکوەزیران مەسرور بارزانی، پەیام بۆ حکومەتەکەی سوودانی دەنێرێت بەوەی کێشەکان چارەسەربکات و رێزی رێککەوتنەکان و دەستووریش بگرێت.

مەحموود عگێلی، گوتیشی: ئەگەر حکومەتی فیدراڵی پابەندی پەیامەکانی ئەمەریکا نەبێت ئەگەری هەیە پەنا بۆ سزای دارایی و رێکاری دیکە دژی بەغدا ببات، هەروەها ئەمەریکا جەخت لە مافە دەستوورییەکانی هەرێمی کوردستان دەکاتەوە.

ئەمینداری حزبی ئومەی عێراقی، باسی لەوەشکرد، نابێت حکومەتەکەی سوودانی پەنا بۆ گوشار و رێکاری دیکە ببات بۆ ملکەچکردنی هەریم، چونکە هەرێمی کوردستان قەوارەیەکی دەستوورییە.

مەحموود عگێلی، سەرنجی بۆ ئەوەش راکێشا، تەنانەت ئەمەریکا توانای هەیە گوشاربکات تا وڵاتانی دراوسێ دەستدرێژییەکانیان بۆسەر هەرێمی کوردستان رابگرن.