رامی نووری: کریستیانەکان بەشێکی دانەبڕاوی کۆمەڵگەی کوردستانین و لەسەر ئەم خاکە بەردەوام دەبین

رامی نووری، قایمقامی عەنکاوە
رامی نووری، قایمقامی عەنکاوە

K24 – هەولێر:

قایمقامی عەنکاوە لەمیانی بەشداریکردنی لە هەڵمەتی چاندنی داری زەیتوون لە ساڵیادی لەدایکبوونی مەلا مستەفا بارزانی، رایگەیاند، کریستیانەکان بەشێکی دانەبڕاوی کۆمەڵگەی کوردستانین و سەرەڕای فەرامۆشکردنی مافەکانیان لەلایەن دەسەڵاتدارانی بەغداوە، پەیامی ئەوان بەردەوامبوونە لەسەر ئەم خاکە.

رۆژی پێنجشەممە (14ـی ئاداری 2024) رامی نووری، قایمقامی عەنکاوە بە کوردستان24ـی راگەیاند، سەرەڕای پەیامی نەرێنییەکانی دەسەڵاتداران لە بەغدا و فەرامۆشکردنی مافەکانی ئێمە، وەک پێکهاتەی کلدانی، سریانی و ئاشووری خۆیان بە خەڵکی رەسەنی خاکی هەرێمی کوردستان دەزانن.

رامی نووری رایگەیاند، کریستیانەکانی هەرێمی کوردستان خاوەنی فەرهەنگێکی مێژوویی و دەوڵەمەندن و بەشێکی دانەبڕاون لە کۆمەڵگەی کوردستانی و جەختیکردەوە: "هەروابووین و هەرواش دەبین".

لەبارەی پێکەوەژیان لە هەرێمی کوردستان، قایمقامی عەنکاوە باسی لەوەکرد، ئەزموونی پێکەوەژیانی پێکهاتە جیاوازەکان لە هەرێمی کوردستان، ئەزموونی سەدان ساڵی بەیەوکەوەژیانی رۆژانەی نێوانیانە و ئەزموونی رووبەڕووبوونەوەی پێکەوەیی چەندین هەڵوێستی خۆش و ناخۆشە و زیاتر گوتی: "ئێمە بێ یەکتر ناتوانین و بەیەکتریشەوە جوانین".

رۆژی (21ـی شوباتی 2024) دادگای فیدراڵی، دوای 11 جار دواخستنی دانیشتنەکانی لەبارەی یاسای هەڵبژاردنی پەرلەمانی کوردستانەوە بڕیاریدا، بۆ خولی شەشەمی هەڵبژاردنی پەرلەمانی کوردستان؛ هەرێمی کوردستان بەسەر چوار بازنەی هەڵبژاردندا دابەش بکرێت و ژمارەی کورسی کۆتاکان کە 11 کورسین هەڵوەشاندەوە، بەو پێیەش کۆی ژمارەی کورسییەکانی پەرلەمانی کوردستان لە 111 کورسییەوە بۆ 100 کورسی کەم دەکرێنەوە.

سکاڵاکان لە دژی پێنج ماددەی یاسای هەڵبژاردنی پەرلەمانی کوردستان (ماددەکانی 1، 9، 15، 22 و 36) تۆمارکرابوو کە تایبەتن بە ژمارەى کورسییەکانی پەرلەمان، یەک بازنەیی و فرە بازنەیی هەڵبژاردن و ژمارەی کورسی کۆتاکان لە پەرلەمانى کوردستان، لەلایەن زیاد جەبار، سەرۆکی فراکسیۆنی یەکێتی لە خولی پێنجەمی پەرلەمانی کوردستان و ئامانج نەجیب شەمعوون، ئەندامى کریستیانەکان لە ئەنجوومەنى پارێزگاى سلێمانى تۆمارکرابوون. ئەمەش بووە جێی نیگەرانی هەردوو پێکهاتەی تورکمان و کریستیانەکان کە دژی ئەوەبوون کورسی کۆتای پێکهاتەکان کەمبکرێتەوە یاخود دابەش بکرێت بەسەر چەند بازنەیەکی هەڵبژاردن بەپێی پارێزگاکانی هەرێمی کوردستان.

بەگوێرەی یاسای هەڵبژاردنی پەرلەمانی کوردستان، پێکهاتەکان 11 کورسی کۆتایان لە پەرلەمان هەبوو بەشێوەیەک پێنج کورسی بۆ تورکمان و پێنج کورسی بۆ کلدان و ئاشووری و سریانەکان و یەک کورسی بۆ ئەرمەنەکان، کە لەسەر بنەمای هەمان یاساش، شێوازی دەنگدان و کێبڕکێ کردن لە نێوان دەنگدەران و نوێنەرانی ئەو پێکهاتانە دەبوو بەشێوەی یەک بازنەیی لەسەر ئاستی هەرێمی کوردستان، بەڵام دادگای فیدراڵی هەڵیوەشاندەوە.

رۆژی (11ـی ئاداری 2024) پارت و هێزه‌كانی كلدانی، سریانی، ئاشووری و ئه‌رمه‌نی له‌ کۆنفرانسێکی رۆژنامه‌وانیدا بایکۆتکردنی هه‌ڵبژاردنی خولی شه‌شه‌می په‌رله‌مانی كوردستانیان راگەیاند.