ئەمساڵ رەمەزان و مانگی قیامەی کریستیانەکان کەوتووەتە هەمان رێککەوت

K24 – سلێمانی:

ئەم ساڵ مانگی رەمەزان و مانگی قیامەی کریستیانەکان كەوتووەتە هەمان بەروارەوە، موسوڵمانان و کریستیانەکان پێكەوە بەڕۆژوودەبن. کریستیانەکانی هەرێمی كوردستان باس لەوە دەكەن، زۆریك لە مەراسیم و نەریتە ئایینییەكان لە نێوان مسوڵمان و کریستیانەکان هاوشێوەن ئەم مانگەش پێكەوە لەگەڵ برا موسوڵمانەكان نزا دەكەین ئەم خاكە بپارێزێت كە تێیدا  كۆبووینەتەوە.

مانگی قیامەی کریستیانەكانە كە زیاتر لە 50 رۆژ بەڕۆژوودەبن، لە ماوەی بەڕۆژبوونیشیان خۆیان دەگرنەوە لە خواردن و خواردنەوەی بەرهەمە ئاژەڵییەكان.

شنودە حەكیم شنودە، قەشە لە کڵێسای قبتیە، بە کوردستان24ـی راگەیاند، کڵیسەکانمان هەموو ساڵێک زۆربەی رۆژەکانی مانگی رەمەزان مووسڵمانان بانگهێشت دەکات و ئێوارخوانیان بۆ ساز دەکات، ئێمە هەموومان یەکترمان خۆشدەوێت، خوشک و براین و نەوەی ئادەمین.

هەرێمی كوردستان بە ناوەندێكی گرنگی پێكهاتە ئایین  و ئاینزاكان دادەنرێت، ئەمەش وایكردووە پێكەوەژیان لە هەرێمی كوردستان تۆختربێت، موسوڵمانان و کریستیانەكان لە مێژووی پێكەوەژیانیان گەواهیدەری ئەو راستیەبوون، لەمانگی رەمەزانیشدا کریستیانەكان خۆیان بەدوورگرتووە لەو نەریتانەی لەگەڵ ئایینی ئیسلامدا ناگونجێت وەكو رێزێك بۆ مانگی رەمەزان و موسوڵمانان.

لای خۆیەوە نوهاد نەجم یاقوت، بەڕێوبەری کڵێسای چوارچرا بە کوردستان24ـی گوت: ئێمە مێژوویەکی دورودرێژمان لەگەڵ خوشک و برا موسوڵمانەکان هەبووە، لە رەمەزانان ئێمە خواردنمان بۆ ئەوان دەبرد، ئەوانیش لە مانگی قیامەدا بە هەمان شێوە خواردنیان بۆ ئێمە دەهێنا، ئێمە رێز لە دابونەریتی یەکدی دەگرین.