ئەرکان بیبانی: ساڵی ڕابردوو دەست بەسەر 2432 حەبی هۆشبەر گیراوە

حەیدەر قوڕەیشی: تیرۆر و ماددە هۆشبەرەکان دوو ڕووی یەک دراون
ئەرکان بیبانی، ئەفسەر لە بەڕێوەبەرایەتی نەهێشتنی ماددە هۆشبەرەکان و حەیدەر قوڕەیشی، راوێژکار له‌ ئاسایشی نیشتمانی عێراق
ئەرکان بیبانی، ئەفسەر لە بەڕێوەبەرایەتی نەهێشتنی ماددە هۆشبەرەکان و حەیدەر قوڕەیشی، راوێژکار له‌ ئاسایشی نیشتمانی عێراق

K24 -هەولێر:

ئەفسەرێک لە بەڕێوەبەرایەتیی نەهێشتنی ماددە هۆشبەرەکان ئاماژە بەوە دەکات، ساڵی ڕابردوو بە تۆمەتی بازرگانیی بە ماددەی هۆشبەر لە هەولێر و دهۆک، دوو هەزار و 482  کەس دەستگیرکراون، هاوکات ئەمساڵ 470 کەس بەهۆی بەکارهێنان و بازرگانیی بە ماددەی هۆشبەر دەستگیرکراون.

ئەرکان بیبانی، ئەفسەر لە بەڕێوەبەرایەتیی نەهێشتنی ماددە هۆشبەرەکان، لە میانەی بەشداریی لە گەشتێکی هەواڵەکانی کوردستان24 رایگەیاند، ساڵی ڕابردوو لە هەولێر و دهۆک دوو هەزار و 482 تۆمەتبارمان دەستگیرکردووە، کە بازرگانییان بە ماددەی هۆشبەر کردووە.

ئەو ئەفسەرەی بەڕێوەبەرایەتیی نەهێشتنی ماددە هۆشبەرەکان، ڕاشیگەیاند، ئەمساڵ 470 کەس بەهۆی بەرکارهێنان و بازرگانیی بە ماددەی هۆشبەر دەستگیرکراون، هەروەها دەست بەسەر دوو هەزار و 432 کگم حەبی هۆشبەری کاپتاگۆن  گیراوە.

ئاماژەی بەوە دا، هەر ساڵی ڕابردوو دەست بەسەر 482  کگم ماددەی هۆشبەری جۆراوجۆر گیراوە، هەروەها دەست بەسەر شەش هەزار و 232 شیت حەبی هۆشبەری پزیشکی گیراوە.

لەبارەی ڕێژەی دەستبەسەرداگرتنی ماددەی هۆشبەرەکان لەم ساڵدا، بیبانی، دەڵێت: ئەمساڵ  دەست بەسەر 39 کگم ماددەی هۆشبەر  گیراوە، هەروەها  ژمارەیەکی زۆر لەو خەڵکانە دەستگیرکراون کە کاری کڕین و فرۆشتن بە ماددەی هۆشبەرەوە دەکەن.

ئەو ئەفسەرەی بەڕێوەبەرایەتیی نەهێشتنی ماددە هۆشبەرەکان، سەرنجی بۆ ئەوە ڕاکێشا، توانیومانە بڵاوبوونەوی ماددەی هۆشبەر ڕابگرین و ڕێگریمان کردووە لەوەی خاکی هەرێمی کوردستان بەکاربهێندرێت وەک ڕێڕەوێک بۆ گواستنەوەی ماددەی هۆشبەر.

ئەرکان بیبانی، ئاشکرای کرد، ماددەی هۆشبەر لە وڵاتانی دراوسێ؛ ئێران و سووریا بە شێوەیەکی نایاسایی دەهێندرێتە هەرێمی کوردستان.

ئەو ئەفسەرەی بەڕێوەبەرایەتیی نەهێشتنی ماددە هۆشبەرەکان، دووپاتی کردەوە، لەگەڵ حکوومەتی فیدراڵی هەماهەنگییەکی باشیان هەیە و توانیویانە بە هاوبەشی چەندین چالاکی بکەین.

ناوبراو جەختی لەوەش کردەوە، لە هەرێمی کوردستان بەدەستخستنی ماددەی هۆشبەر لە چاو ساڵانی ڕابردوو، زۆر ئەستەم بووە.

لەلایەن خۆیەوە حەیدەر قورەیشی، راوێژکار له‌ ئاسایشیی نیشتمانی عێراق بە کوردستان24ـی ڕاگەیاند، تیرۆر و ماددە هۆشبەرەکان دوو ڕووی یەک دراون، هەورەها ئەرکێکی نیشتمانییە ڕووبەڕووی ماددەی هۆشبەر ببینەوە.

ئەو ڕاوێژکارەی ئاسایشی نیشتمانی عێراق باسی لەوەکرد، ژمارەی بەکارهێنەرانی ماددەی هۆشبەر لە عێراق زیادی کردووە، هەروەها پێویستە هەردوو حکوومەتی هەرێمی کوردستان و فیدراڵ جیددیتر کاربکەن لەسەر ئەم دیاردەیە و ساڵی ڕابردوو هەماهەنگی باش کراوە بۆ ڕووبەڕووبوونەوەی دیاردەکە.

حەیدەر قورەیشی، گوتی: ستراتیجییەتی نیشتمانی بۆ ڕووبەڕووبوونەوەی ماددەی هۆشبەر و کارتێکەرە ئەقڵییەکان بۆ ساڵی 2024 تا 2028 هەیە، ئەم ستراتیجییەتە لە لایەن دەزگای ئاسایشی نیشتمانی عێراق دانراوە.

ئەو ڕاوێژکارەی ئاسایشی نیشتمانیی عێراق، گوتیشی: ئەگەر ستراتیجییەتەکە وەک خۆی جێبەجێ بکرێت، ماددەی هۆشبەر بە ڕێژەی 40% بۆ 50% کەم دەبێتەوە.