سەردانەكەی ئەردۆغان پەیوەندییەكانی توركیا و عێراق دەباتە قۆناغێكی نوێ

ئاڵای عێراق و تورکیا
ئاڵای عێراق و تورکیا

K24 - هەولێر

لە سەردانەكەی سەرۆككۆماری توركیا بۆ عێراق، پرسی پەكەكە تەوەرێكی سەرەكی كۆبوونەوەكانی دەبێت. وەزیری بەرگریی توركیا دەڵێت، لە سەردانەكەدا رێککەوتنێکی ستراتیژیی لەگەڵ دەسەڵاتدارانی عێراق واژۆ دەكەن.

سەردانەكەی رەجەب تەیب ئەردۆغان، سەرۆككۆماری توركیا بۆ عێراق، پەیوەندییەكانی ئەو دوو وڵاتە بەرەو قۆناغێكی نوێ دەبات.

سەرۆككۆماری توركیا پێی وایە لایەنی عێراقی بایەخێکی زۆر بە سەردانەکەی دەدات و بە سەردانەکەش پەیوەندییەکانی نێوان تورکیا و عێراق دەچێتە قۆناغێكی نوێوە.

بەپێی زانیارییەکان، چوار دۆسیەی سەرەکی، کە پێکەوە گرێدراون کرۆکی ئەم سەردانەی ئەردۆغان پێکدەهێنن. ئەو دۆسیانەش بریتین لە پرسی پەکەکە، پرسی هەناردەکردنەوەی نەوتی هەرێمی کوردستان، پرسی ئاو و پڕۆژەی رێگەی گەشە.

ھاوكات وەزیری بەرگریی تورکیا وادەی سەردانەكەی ئەرۆغان بۆ عێراق كە رۆژی 22ی ئەم مانگە دیاریكراوە، پشتڕاست کردەوە و ڕایگەیاند، دوای چەندین ساڵ بۆ یەکەمجار ڕێککەوتنێکی ستراتیژییان لەگەڵ دەسەڵاتدارانی عێراق واژۆ کردووە.

ئەم گوتانەی وەزیری بەرگری توركیا لە كاتێكدایە، قاسم ئەعرەجی، ڕاوێژكاری ئاسایشی نیشتمانیی عێراق سەردانەكەی ئەردۆغان بە قۆناغێكی نوێ لە ئاست پەیوەندییەکان و لێکتێگەیشتن و هاوکاری نێوان هەردوو وڵات دەزانێت.

ئەعرەجی ڕایگەیاند، عێراق خوازیاری كۆتاییھێنان بە ناكۆكییەكانە بەتایبەت پرسی پەكەكە. بە پێویستیش دەزانێت، "پرسی گرووپە چەكدارەكان كە لە ھەردوو دیوی توركیا و عێراق ھێرشی چەكداری ئەنجام دەدەن، چارەسەر بكرێت. بۆ ئەم مەبەستەش دەبێت ئەو گروپانە چەك دابنێن و ھەرچی زووە كۆتایی بەم دۆخە بھێنن".

 راوێژكاری ئاسایشی نیشتمانی عێراق ئاماژەی بەوەش کرد، "دەستووری عێراق بوونی ئەم گرووپانە بە تەواوی رەتدەکاتەوە. عێراق بەدوای سەقامگیری سیاسی و کۆمەڵایەتی بەردەوامدا دەگەڕێت بۆ ئەوەی بوارێکی فراوان بدات بە حکوومەت بۆ جێبەجێکردنی پلانەکانی".

لە وەرزی نوێی پەیوەندیی بە دونیای دەرەوەدا، ئەردۆغان دەیەوێت تەواوی گرفتەکانی لەگەڵ وڵاتانی ناوچەکەدا یەکلایی بکاتەوە و تا ئاستێکی زۆریش سەرکەوتنی بەدەستهێناوە. هەر لە سعوودییە تا دەگاتە ئیسرائیل، دیپلۆماسیەتی تورکی خۆی بنیاتناوەتەوە، بەڵام بۆ عێراقێك كە ھەموو شتەكان تیادا ئاڵۆزن پێدەچێت ئەم قوڕە ئاوێكی زیاتری بوێت.