هێمن موراد: گەنمی جووتیارانی کوردستان هەناردەی دەرەوە ناکەین

K24- هەولێر

بەڕێوەبەری گشتیی کشتوکاڵی هەولێر ئاماژە بەوە دەکات، هەناردەکردنی گەنمی جووتیارانی کوردستان بۆ دەرەوەی وڵات، لە بەرژەوەندیی جوتیاران نییە، چونکە نرخی گەنم لە بۆرسەی جیهانیی زۆر هەرزانە.

ئەمڕۆ سێ شەممە(7ی ئایاری 2024)، هێمن موراد، بەرێوەبەری گشتیی کشتوکاڵی هەولێر بە کوردستان24 ی ڕاگەیاند، گەنمی جووتیارانی کوردستان هەناردەی دەرەوە ناکەین، چونکە نرخی گەنم پەیوەستە بە نرخی بۆرسەی جیهانیی گەنم، گوتیشی: ئەو نرخەی ئێستا لە سایلۆ بەبازاڕ دەکرێت، نرخی پشتگیریکراوە بۆ جووتیاران.

بۆ ئەوەی گەنمی جووتیارانی کوردستانیش لەناوخۆدا ساغ بکرێتەوە، بەڕێوەبەری گشتیی کشتوکاڵی هەولێر ڕایدەگەیەنێت، سنوورەکانی هەرێمی کوردستان کۆنترۆڵ دەکەن بۆ ئەوەی هیچ گەنمێک لە دەرەوەی وڵات هاوردە نەکرێت، بۆ ئەوەی سوود لە گەنمی جووتیارانی ناوخۆ وەربگیرێت بۆ کارگەکانی ئالیک و پیشەسازیی ئالیک، بەوەش دەتوانرێت پشتیوانیی لە جووتیارانی کوردستان بکرێت، ئەگەر تەواوی گەنمی جووتیارانیش لە بەغدا ساغ نەکرێتەوە.