سبەی لێژنەی دارایی پەرلەمانی عێراق میوانداریی وەزیری دارایی دەکات

تەیف سامی، وەزیری دارایی عێراق (وێنە: نووسینگەی ڕاگەیاندنی وەزیری دارایی)
تەیف سامی، وەزیری دارایی عێراق (وێنە: نووسینگەی ڕاگەیاندنی وەزیری دارایی)

سبەی ليژنەی دارایی پەرلەمانی عێراق میوانداریی وەزیری دارایی دەکات. ئەندامێکی لیژنەکەش دەڵێت، هەموو هەوڵێک دەدرێت پێش 09ـی نیسان، هەمواری بودجەی 2024 پەسەند بکرێت.

ئەمڕۆ شەممە، 25-05-2024، خەلیل غازی، ئەندامی لێژنەی داریی پەرلەمانی عێراق بە کوردستان24ـی ڕاگەیاند، سبەی یەکشەممە، 26-05-2024، لێژنەی داریی میوانداریی تەیف سامی، وەزیری دارایی فیدراڵی دەکات بۆ ئەوەی وەڵامی ژمارەیەک پرسیار و تێبینی ئەندامانی لیژنەکە لەبارەی هەمواری خشتەکانی بودجەی ساڵی 2024ـی بداتەوە.

هەرچەندە دوو هەفتە لە بەردەم پەرلەمانی عێراقدایە بۆ ئەوەى دەنگ لەسەر خشتەى بودجەى 2024 بدات، لە کاتێکدا لە 9ى حوزەیران پشووى پەرلەمان دەست پێ دەکات. خەلیل غازی جەختی لەوە کردەوە، هەموو هەوڵێک دەدرێت پێش 09ـی حوزەیران، هەمواریی بودجەی 2024 پەسەند بکرێت.

لە لایەکی دیکەوە، موختار موسەوی، ئەندامی لێژنەی دارایی پەرلەمانی عێراق ڕایگەیاند، بەهۆی بوونی تێبینی زۆر لەسەر هەمواریی خشتەکانی بودجەی 2024، لەوانەیە پەسەندکردنی هەموارەکە دوا بکەوێت، چونکە وەکو خۆی دەڵێت، پشکی پارێزگاکان لە بودجەکە کەم کراوەتەوە و ئەمەش ناڕەزایەتیی لێ کەوتووەتەوە.

بودجەی ساڵی 2024ـی عێراق، 211 ترلیۆن دینارە و 66 ترلیۆن و 600 ملیار دینار کورتهێنانی هەیە. پشکی هەرێمی کوردستان لە هەمواریی بودجەکەدا،  20 ترلیۆن و 900 ملیار دینارە کە نزیکەی 12 ترلیۆنی بۆ مووچەی فەرمانبەرانە و، نزیکەی هەشت ترلیۆن دیناریش بودجەی وەبەرهێنان و خەرجییەکانی دیکەیە، کە پێشبینی دەکرێت بە پەسەندکردن و خەرجکردنیی گەشەی ئابووری لە هەرێمی  کوردستان زیاتر دەبێت.