رۆژێكی ئاگرین لە خولی ئەستێرەكانی عێراق بەڕێوەیە

ئەحمەد ئیبراهیم كاپتنی زاخۆ، سەرهەنگ موحسین كاپتنی نەجەف، ئەیمەن حوسێن هێرشبەری جەوییە، محەمەد سامی كاپتنی نەورۆز
ئەحمەد ئیبراهیم كاپتنی زاخۆ، سەرهەنگ موحسین كاپتنی نەجەف، ئەیمەن حوسێن هێرشبەری جەوییە، محەمەد سامی كاپتنی نەورۆز

لە گەڕی 32ـی خولی ئەستێرەكانی عێراق، لە یاریی لوتكەدا نەورۆز میوانداریی یانەی قوە جەوییە دەكات، یانەی زاخۆش بۆ بەردەوامیدان بە سەركەوتنەكانی روودەكاتە شاری نەجەف.

لە سلێمانی یاریی لوتكە بەڕێوەیە
ئێوارەی هەینی 31/5/2024، لە یاریگەی مەلعەبەكە لە شاری سلێمانی، یانەی نەورۆز لە كاتژمێر 04:15ـی خولەكی ئێوارە باوەش بۆ یانەی قوە جەوییە دەكاتەوە، ئەمە دەبێتە سێیەمین سەردانی یانەكەی بەغدا بۆ سلێمانی، پێشتر دووجاری دیكە لە هەمان یاریگە سەركەوتنی بەرامبەر سوورپۆشەكانی سلێمانی تۆمار كردووە.
 لە مێژووی خۆیاندا، نەورۆز و قوە جەوییە پێنجار رووبەڕووی یەكتر بوونەتەوە، هەر پێنج یارییەكەش بە سەركەوتنی جەوییە كۆتایی هاتووە، لە دوایین یاریی نێوانیان لە قۆناغی یەكەم، نەورۆز لە دەرەوەی یاریگەی خۆی بە ئەنجامی 2 گۆڵ بەرامبەر تاكە گۆڵێك یارییەكەی دۆڕاند، گۆڵەكەی نەورۆز لە رێگەی محەمەد سامی تۆمار كرا، گۆڵەكانی جەوییشە ئەیمەن حوسێن و عەلی جاسم تۆماریان كرد.
قوە جەوییە بە 66 خاڵ پلەی دووەمی ریزبەندی خولی ئەستێرەكانی عێراقی گرتووە، لە بەرامبەردا نەورۆز بە 45 خاڵ لە پلەی حەوتەمی ریزبەندی دێت.

زاخۆ بۆ 3 خاڵی یارییەكە گەشتی نەجەفی كردووە
یانەی زاخۆ لە 2024 هیچ یارییەكی لە خولی ئەستێرەكانی عێراق نەدۆڕاندووە، 150 رۆژە هیچ یانەیەك نەیتوانیوە شكست بە زاخۆ بێنێت، بۆ ئەم هەفتەیەش زاخۆ لە دەرەوەی یاریگەی سبەی هەینی كاتژمێر 06:30ـی ئێوارە لە یاریگەی ئۆڵمپی نەجەف رووبەڕووی یانەی نەجەف دەبێتەوە. 
زاخۆ لەم وەرزە لە كۆی 30 یاری، 14 بردنەوە 13 یەكسان و 3 دۆڕانی هەیە و بە كۆكردنەوەی 55 خاڵ لە پلەی چوارەمی ریزبەندی دێت، لە بەرامبەردا یانەی نەجەفیش بە 53 خاڵ لە ریزبەندی پێنجەمی خولی ئەستێرەكانی عێراق دێت.