مەسرور بارزانی و قەیس خەزعەلی کۆبوونەوە

مەسرور بارزانی، سەرۆکی حکوومەتی هەرێمی کوردستان و قەیس خەزعەلی، ئه‌مینداری گشتیی عه‌سائیب ئه‌هلی حه‌قی عێراقی
مەسرور بارزانی، سەرۆکی حکوومەتی هەرێمی کوردستان و قەیس خەزعەلی، ئه‌مینداری گشتیی عه‌سائیب ئه‌هلی حه‌قی عێراقی

K24 - هەولێر:

سەرۆکی حکوومەتی هەرێمی کوردستان و ئه‌مینداری گشتیی عه‌سائیب ئه‌هلی حه‌قی عێراقی، دوایین گۆڕانکاری و پەرەسەندنەکانی عێراق و هەوڵەکانی چارەکردنی کێشەکانی حکوومەتی فیدراڵ و هەرێمی کوردستان و گرنگیی دابینکردنی ماف و شایستە داراییەکانی خەڵکی کوردستان لە سەر بنەمای دەستوور تاوتوێ دەکەن.

ئەمڕۆ پێنجشەممە (30ـی ئایاری 2024) مەسرور بارزانی، سەرۆکی حکوومەتی هەرێمی کوردستان، لەگەڵ قەیس خەزعەلی، ئه‌مینداری گشتیی عه‌سائیب ئه‌هلی حه‌قی عێراقی کۆبووەوە.

بەپێی ڕاگەیەندراوی حکوومەتی هەرێمی کوردستان لە کۆبوونەوەی نێوان سەرۆکوەزیرانی هەرێمی کوردستان و ئه‌مینداری گشتیی عه‌سائیب ئه‌هلی حه‌قی عێراقی، بیروڕا لەبارەی دوایین گۆڕان و پەرەسەندنەکانی عێراق و هەوڵەکانی چارەکردنی کێشەکانی حکومەتی فیدراڵ و هەرێمی کوردستان و گرنگیی دابینکردنی ماف و شایستە داراییەکانی خەڵکی کوردستان لە سەر بنەمای دەستوور ئاڵوگۆڕ کرا.

سەرۆکی حکوومەتی هەرێمی کوردستان پێش ئەوەی لەگەڵ قەیس خەزعەلی لە بەغدا کۆبێتەوە، لەگەڵ هەریەکە لە هادی عامری، ئەمینداری گشتیی ڕێکخراوی بەدر و سەرۆکی هاوپەیمانیی (نبني- بنیاتنان) و محەممەد شییاع سوودانی، سەرۆکوەزیرانی عێراق و قاسم ئەعرەجی، ڕاوێژکاری ئاسایشی نیشتیمانیی عێراق کۆبووەوە.

دیلان بارزان، پەیامنێری کوردستان24 لە بەغدا، ڕایگەیاند، دوای کۆبوونەوەی سەرۆکوەزیران مەسرور بارزانی لەگەڵ قەیس خەزعەلی، بڕیارە لەگەڵ خەمیس خەنجەر، سەرۆکی هاوپەیمانی سیادە کۆبێتەوە، بابەتی مووچەی مووچەخۆرانی هەرێمی کوردستان یەکێکە لە تەوەرە سەرەکییەکانی کۆبوونەوەکانی سەرۆکوەزیران مەسرور بارزانی لەگەڵ بەرپرسانی حکوومەتی عێراق.

ئەمڕۆ پێنجشەممە، (30ـی ئایاری 2024) مەسرور بارزانی، سەرۆکی حکوومەتی هەرێمی کوردستان لە هەژماری خۆی لە تۆڕی کۆمەڵایەتیی ئێکس لەبارەی سەردانەکەی بۆ بەغدا ڕایگەیاند، "ئەمڕۆ لە بەغدام بۆ جەختکردنەوە لەسەر دابینکردنی مافەکانی خەڵکی کوردستان و چارەسەرکردنی ناکۆکییەکان بە گفتوگۆ و لەسەر بنەمای دەستوور".

سەرۆکی حکوومەتی هەرێمی کوردستان لە بەشێکی دیکەی پۆستەکەیدا جەختی لەوە کردووە: "دەبێت سەقامگیریی و ئابوورییەکی بەهێز کاری لەپێشینەمان بێت".

1
2
3