ناتانیاهۆ: حزبووڵڵای لوبنانی باجی هێرشەکەی مەجدەل شەمس دەدات

K24 – هەولێر:

لە ئەنجامی هێرشێکی مووشەکی بۆ سەر مەجدەل شەمس 12 کەس کوژران، سەرۆکوەزیرانی ئیسرائیل دەڵێت: حزبووڵڵای لوبنانی باجی هێرشەکەی مەجدەل شەمس دەدات.

کەناڵی 13ی ئیسرائیلی ڕایگەیاند، بەهۆی هێرشێکی مووشەکی بۆ سەر یاریگەیەکی تۆپی پێ لە شاری مەجدەل شەمسی بەرزاییەکانی جۆلان لانیکەم 12 کەس کوژران و زیاتر لە 30  دیکەش برینداربوون.

بنیامین ناتانیاهۆ، سەرۆکوەزیرانی ئیسرائیل، حزبووڵڵای لوبنانی بە ئەنجامدانی هێرشەکە تۆمەتبار کردووە و حزبووڵڵاش ڕەتی دەکاتەوە هیچ پەیوەندییەکیان بە هێرشەکەی مەجدەل شەمسەوە هەبووێت.

سەرۆکوەزیرانی ئیسرائیل، گوتی: حزبووڵڵای لوبنانی باجی هێرشەکەی مەجدەل شەمس دەدات.

لای خۆیەوە دانیال هاگاری، گوتەبێژی سوپای ئیسرائیل، ڕایگەیاند: "ڕێکخراوی تیرۆریستی حزبووڵڵای لوبنانی مووشەکێکیان ئاراستەی چەند منداڵێک لە یاریگەیەکی تۆپی پێ کرد لە مەجدەل شەمس لە باکووری ئیسرائیل."

گوتیشی: "حزبووڵڵا درۆی لەگەڵ تەواوی جیهان کرد و ڕایگەیاندوە، ئەوان هێرشەکەیان نەکردووە. ئەمە دۆریە، دەتوانین پشتڕاستی بکەیەنەوە، حزبووڵڵا ئەم منداڵانەی لەم هێرشە دڕندانەیەدا کوشتوون. هەموویان لە تەمەنی نێوان 10 بۆ 20 ساڵ بوون."