سوپاى عێراق: تا ئێستا نزيكه‌ى هه‌زار داعش له مووسڵ كوژراوون
K24 – هه‌ولێر:
فه‌رمانده‌يه‌كى باڵاى سوپاى عێراق رايگه‌ياند، ته‌نيا له مووسڵ نزيكه‌ى 1000 چه‌كدارى داعش كوژراوون.
دواى شه‌ش هه‌فته له ده‌ستپێكردنى ئۆپراسيۆنى كۆنترۆڵكردنه‌وه‌ى مووسڵ، هێزه عێراقييه‌كان توانيويانه نيوه‌ى كه‌رتى خۆرهه‌ڵاتى شارى مووسڵ كۆنترۆڵ بكه‌ن و له گه‌ڕه‌كێكه‌وه بۆ يه‌كێكى ديكه هه‌وڵى پێشڕه‌ويكردن بده‌ن.
فيرقه‌ى ئاڵتوونى سوپاى عێراق ته‌نيا هێزى تايبه‌تى عێراقييه توانيويه‌تى بچێته ناو گه‌ڕه‌كه‌كانى خۆرهه‌ڵاتى مووسڵ و شكست به داعش بهێنێت.
هه‌ريه‌ك له پێشمه‌رگه و سوپا و هێزه‌كانى پۆليسى ئيتحادى له باكوور و باشووره‌وه به‌ره‌و مووسڵ پێشڕه‌ويان كردووه.
ميليشياكانى حه‌شدى شه‌عبيش له خۆرئاواوه ده‌يانه‌وێت گه‌مارۆى مووسڵ بده‌ن.
ليوا عه‌بدولغه‌نى ئه‌سه‌دى يه‌كێك له فه‌رمانده‌ى هێزه تايبه‌ته‌كانى عێراق رايگه‌ياند، هێزه‌كانيان ته‌كتيكى نوێ به‌كارده‌هێنن و له يه‌ك كاتدا له گه‌ڕه‌كێك زياتر گه‌مارۆ ناده‌ن بۆ ئه‌وه‌ى پارێزگارى له گيانى مه‌ده‌نييه‌كان بكه‌ن.
ئه‌و گوتيشى: سه‌ره‌تا پێشڕه‌وييه‌كان خێرابوون، چونكه ناوچه‌كان خاڵى بوون له مه‌ده‌نييه‌كان، به‌ڵام له باره‌ى ناو مووسڵه‌وه ره‌وشه‌كه پێچه‌وانه‌يه چونكه هاووڵاتيانى مه‌ده‌نى ماونه‌ته‌وه.
ئه‌و گوتيشى: 990 چه‌كدارى داعش ته‌نيا له رووبه‌ڕووبوونه‌وه‌كانى به‌شى خۆرهه‌ڵاتى شارى مووسڵ كوژراوون.
سه‌باره‌ت به زيانه گيانى و ماڵييه‌كانى سوپا و هێزه تايبه‌ته‌كانى عێراق هيچ زانيارييه‌كى رانه‌گه‌ياند.
هه‌روه‌ها ئه‌وه‌شى روونكردووه‌ته‌وه، هێزه ئه‌منييه‌كان ده‌ستكارى پلانه‌ى سه‌ره‌تايى پرۆسه‌ى كۆنترۆڵكردنه‌وه‌ى مووسڵيان كردووه و له گوێره‌ى هه‌لومه‌رجى نوێ و سرووشتى رووبه‌ڕووبوونه‌وه‌كانى داعش گۆڕانكارييان تێدا كردووه.
باسى له‌وه‌شكردووه، تۆپى دوورهاوێژ و تانك چالاك نيين له شه‌ڕه‌كه‌دا و هێزى ئاسمانى هاوپه‌يمانێتى دژى داعشيش به هۆى مه‌ده‌نييه‌كانه‌وه ناتوانن زۆر پرۆسه ئه‌نجام بده‌ن.