ده‌قی ئه‌و شه‌ڕه‌قسه‌ی نێوان ریگیلیۆن و سوارێز و پیكێ بڵاو كرایه‌وه‌

مشتومڕی نێوان ئه‌م یاریزانانه‌ له‌ میدیاكان ده‌نگی دایه‌وه‌

سه‌رچاوه‌یه‌كی راگه‌یاندنی مه‌دریدی ده‌قی ئه‌و مشتومڕییه‌ی نێوان ریگیلیۆن، سوارێز، پیكێ و مێسی بڵاو كردۆته‌وه‌ كه‌ له‌ كلاسیكۆی رابردوو روویدا.

پێگه‌ی ماركای ئیسپانیا ئاماژه‌ی بۆ ئه‌وه‌ كردووه‌ سێرجیۆ ریگیلیۆن كه‌ له‌ دوو كلاسیكۆی رابردوو له‌ شوێنی مارسێلۆی به‌رازیلی یاری كرد و به‌ ئاستێكی به‌رز سه‌رنجی هه‌موولایه‌كی بۆ خۆی راكێشا، جیا له‌وه‌ش مشتومڕ و شه‌ڕه‌قسه‌كه‌ی له‌گه‌ڵ یاریزانانی بارسێلۆنا له‌ سۆشیاڵ میدیا ده‌نگی دایه‌وه‌.

سه‌رچاوه‌كه‌ نووسیویه‌تی: له‌ كلاسیكۆی رابردوو كاتێك ریگیلۆن ده‌ست به‌رز ده‌كاته‌وه‌ و به‌سه‌ر پیكێ ده‌قیرێنێت، راسته‌وخۆ پیكێ دێته‌ ده‌نگ و ده‌ڵێت: حاڵتان زۆر باش نییه‌ و خۆت له‌به‌رده‌م هانده‌ران به‌ پاڵه‌وان پیشان مه‌ده‌ و قسه‌ی زیاتریش به‌ ئێمه‌ مه‌ڵێ.؟

دواتر لویس سوارێزی هێرشبه‌ری ئۆروگوایی دێته‌ ده‌نگ و به‌ ریگیلیۆنی ته‌مه‌ن 22 ساڵ ده‌ڵێت: منداڵه‌ ساوایه‌كه‌ مه‌گری.

پاشان ریگیلیۆن وه‌ڵامیان ده‌داته‌وه‌ و به‌ سوارێز ده‌ڵێت: نه‌كه‌ی ده‌ستم لێ بده‌یت، چونكه‌ تۆ زۆر نابووت و ناشرینی.

دواتر لیۆنێل مێسی كاپتنی بارسێلۆنا ده‌یه‌وێت نێوه‌ندگیری بكات، به‌ڵام راسته‌وخۆ ریگیلۆن به‌سه‌ر لیۆ دا هاوار ده‌كات و ده‌ڵێت: بگه‌ڕێوه‌ دواوه‌ و خۆت تێهه‌ڵمه‌قورتێنه‌ هه‌ی ئه‌سپێی پیس.

بارسێلۆنا له‌ ماوه‌ی 72 كاتژمێر دووجاری له‌ یاری كلاسیكۆ رووبه‌ڕووی ریال مه‌درید بووه، یانه‌ كه‌ته‌لۆنیاییه‌كه‌ هه‌ردوو یارییه‌كه‌ی له‌سه‌ریه‌ك له‌ یاریگه‌ی بێرنابیۆ برده‌وه‌.

مێسی له‌ كاتی نێوه‌ندگیری له‌ نێوان ریگیلیۆن و سوارێز
مێسی له‌ كاتی نێوه‌ندگیری له‌ نێوان ریگیلیۆن و سوارێز