هه‌سه‌ده: له باغۆزدا 60 هه‌زار كه‌س خۆیان راده‌ست كردووه
K24 – هه‌ولێر:
هێزه‌كانی سووریای دیموكرات(هه‌سه‌ده) رایگه‌یاند، تا ئێستا 60 هه‌زار كه‌س له دوایین مۆڵگه‌ی داعش له رۆژهه‌ڵاتی فورات، خۆیان راده‌ستی هێزه‌كانیان كردووه.
هه‌سه‌ده راشیگه‌یاند، له ناو ئه‌و كه‌سانه‌ی له باغۆز هاتوونه‌ته ده‌ره‌وه، 5 هه‌زار كه‌سیان چه‌كداری داعش بوون.
وته‌بێژی هه‌سه‌ده، كینۆ جبریل، رایگه‌یاند، دوای ئه‌وه‌ی هێزه‌كانی هه‌سه‌ده و هاوپه‌یمانی نێوده‌وڵه‌تی گه‌مارۆی باغۆزیان داوه تا ئێستا 29 هه‌زار و 600 كه‌س له‌و ناوچه‌یه هاتوونه‌ته ده‌ره‌وه و خۆیان راده‌ستی هه‌سه‌ده كردووه و زۆربه‌شیان خێزان و كه‌سوكاری چه‌كدارانی داعش بوون.
گوتیشی: هێزه‌كانمان توانیویانه 34 هه‌زار هاووڵاتی مه‌ده‌نی له ناوچه‌كه رزگار بكه‌ن.
روونیشیكرده‌وه، له ئاكامی هێرشه‌كانیان بۆ سه‌ر چه‌كدارانی داعش و بۆردومانی فڕۆكه‌كان، 1306 چه‌كدار كوژراوون.
ئاشكراشیكرد، له شه‌ڕی باغۆزدا 82 شه‌ڕڤانی هه‌سه‌ده گیانیان به‌ختكردووه و 61 شه‌ڕڤانیش بریندار بوون.
وته‌بێژه‌كه‌ی هه‌سه‌ده ئه‌وه‌شی گوت: 520 چه‌كداری داعش له چه‌ند ئۆپراسیۆنێكی تایبه‌تدا ده‌ستگیركراوون.
هه‌سه‌ده ده‌یان هه‌زار هاووڵاتی رزگاربووی ژێر ده‌ستی داعشی له كه‌مپی "ئه‌لهۆل" له باكووری خۆرهه‌ڵاتی سووریا نیشته‌جێ كردوون و تا ئێستا ژماره‌ی دانیشتوانی كه‌مپه‌كه گه‌یشتووه‌ته 67 هه‌زار كه‌س و 90 له سه‌دیان منداڵ و ژنن.
سه‌رچاوه: رۆیته‌رز
ئ.ر