هەناردەی نەوتی عێراق و سعوودیە بۆ ئەمەریکا بۆ سفر دادەبەزێت

K24 - ھەولێر

فەرمانگەی زانیاری وزەی ئەمەریکا بڵاویکردەوە، کە هاوردەی نەوتی عێراق و سعوودیە لە هەفتەی رابردوودا بۆ سفر دابەزیوە.

ئەو فەرمانگە ئەمەریکییە لە نوێترین راپۆرتیدا بڵاویکردووەتەوە، کە ناوەندی هاوردەی نەوتی ئەمەریکا لە چوار مانگی رابردوودا، تەنیا لە چوار وڵات بووە و تێکڕای هاوردەکەش 4 ملیۆن و 792 هەزار بەرمیل نەوتی رۆژانە بووە، کە ئەو بڕەش بەراورد بە هەفتەی پێش خۆی 197 هەزار بەرمیل نەوت زیاتر بووە.

لە راپۆرتەکەدا هاتووە، لە هەفتەی رابردوودا ئەمەریکا هیچ بڕە نەوتێکی لە عێراق و سعوودیە هاوردە نەکردووە، لە کاتێکدا لە هەفتەی پێشووتر 123 هەزار بەرمیل نەوتی رۆژانەی لە عێراق و 118 هەزار بەرمیل نەوتی لە سعوودی هاوردەکردووە.

بەگوێرەی راپۆرتەکە ئەو بڕە نەوتەی هاوردەکراون لە هەفتەی رابردوو، بە پلەی یەکەم لە کەنەدا بووە، دوای ئەویش مەکسیک و کۆڵۆمبیا و نێجیریا.