وەزارەتی خوێندنی باڵای عێراق داتای هەزاران قوتابی تۆمارنەکردووە

K24 - هەولێر

وەزارەتی خوێندنی باڵای عێراق داتای زیاتر لە سێ هەزار قوتابی کۆلیژی "ئەلسەلام"ـی ئەهلی تۆمارنەکردووە. قوتابییەکان ناڕازین و داوای چارەسەرکردنی کێشەکە دەکەن.

بەیانیی ئەمڕۆ چوارشەممە، 27-03-2024، زیاتر لە سێ هەزار قوتابی بەشە جیاکانی قۆناغی چوارەمی کۆلیژی "ئەلسەلام"ـی ئەهلی لە بەغدا، لە بەردەم باڵەخانەی وەزارەتی خوێندنی باڵا و توێژینەوەی زانستیی عێراق خۆپیشاندانیان دەستپێکرد.

لەبارەی هۆکاری خۆپیشاندانەکە، قوتابییەکان بە میدیا عێراقییەکانیان راگەیاندووە، چوار ساڵە لە کۆلیژەکە دەخوێنن و کرێی هەر چوار ساڵی خوێندنەکەیان بە تەواوەتی داوە، کەچی ئێستا بۆیان دەرکەوتووە هیچ داتایەکیان لە لایەن وەزارەتی خوێندنی باڵا و توێژینەوەی زانستی عێراقەوە تۆمارنەکراوە، بە قوتابی کۆلیژەکە هەژمارنەکراون و بڕوانامەیان پێ نادرێت.

وەزارەتی خوێندنی باڵا و توێژینەوەی زانستی عێراق بە قوتابییەکانی راگەیاندووە، هیچ داتایەکیانتۆمارنەکردووە و کۆلیژەکەیان لەو هەڵەیە بەرپرسیارە. کۆلیژەکەش بەرپرسیارێتییەکە دەخاتە ئەستۆی وەزارەتی خوێندنی باڵا و توێژینەوەی زانستیی عێراق.

قوتابییان داوا لە وەزارەتەکە دەکەن بە هەر رێگەیەک بێت چارەسەری کێشەکەیان بۆ بکەن، چونکە وەکو خۆیان دەڵێن، دوای چار ساڵ خوێندن و پێدانی کرێی خوێندنی هەر چوار ساڵەکە، چارەنووسیان نادیارە.