Serokwezîr serperiştiya civîna Encûmena Bilind a Aboriyê kir

Îro bi serperiştiya Serokwezîrê Herêma Kurdistanê û bi amadebûna Cîgirê Serokwezîr civîneke Encûmena Bilind a Aboriyê ya Herêma Kurdistanê hat lidarxistin.

Hewlêr (K24) – Îro bi serperiştiya Serokwezîrê Herêma Kurdistanê Mesrûr Barzanî û bi amadebûna Cîgirê Serokwezîr Qubad Talebanî civîneke Encûmena Bilind a Aboriyê ya Herêma Kurdistanê hat lidarxistin.

Di destpêka civînê de, Serokwezîr Mesrûr Barzanî diyar kir ku her çiqas niha Herêma Kurdistanê û Iraq û cîhan bi giştî di rewşeke dijwar a aborî re derbas dibe, lê kabîneya nehem di xebata vejandin û pêşvebirina aborî û avakirina jêrxana aboriya bihêz û serkeftî de berdewam e, ku Herêma Kurdistanê xwedî derfeta wê yekê ye ku bibe navenda bazirganî ya girîng li Iraq û herêmê, bi rêya rakişandina veberhênana biyanî ji bo encamdana projeyên stratejîk.

Di beşeke civînê de Sekreterê Encûmena Wezîran Dr. Amanc Rehîm raporta lijneyeke taybet a derbarê kêşeya kalîteya benzîn û sotemeniyên hawirdekirî ji derveyî Herêma Kurdistanê, eşkere kir. Di civînê de hemû pêşniyarên ji bo çareserkirina vê kêşeyê hatin pesendkirin, di nav wan de girîngiya yekkirin û nûkirina pîvan û standarda teknîkî û tendirustî û silametî û jîngeha pîvana kalîteya sotemeniyan li seranserê Herêmê.

Herwiha pêşvebirina taqîgehên navendên pişkinîna kalîteya sotemeniyê li Herêmê û dabînkirina amûrên pişkinîn û pêwîstiyên wê û raspartina Wezareta Navxwe û asayîşa bazirganiyê û tîmên çavdêriya bazirganî, ji bo lipeyçûna babeta kalîteya sotemeniyên hawirdekirî li deriyên sînorî û li nav depoyên sotemenî û benzînxaneyan û rêgirtina li wan kesan ku madeyên kîmyayî yên neguncaw bi kar tînin ji bo zêdekirina kalîteya benzînê bi şêweyekî nerast, ku encamên wê yên neyênî û xirab li ser jiyan û silametiya welatiyan û jîngeha Herêma Kurdistanê heye, tevî encamên darayî.

Di civînê de tekezî hat kirin ku bac ji qezencên kompaniyên hawirdekirina sotemenî were wergirtin, bi mercekî ku ev rêkar bandorê li ser zêdekirina buhayê sotemeniyê bo welatiyan neke.