Serok Barzanî: Ti behaneyek ji bo paşxistina hilbijartinan nayê qebûlkirin

Serok Mesûd Barzanî pêşwazî li şandeke Amerîkî bi serokatiya Rêkxerê Koşka Spî bo Karûbarên Rojhilata Navîn û Bakurê Efrîqayê Brett McGurk kir

Navenda Nûçeyan (K24) – Serok Mesûd Barzanî îro 17ê Çileya 2023an pêşwazî li şandeke Amerîkî ku ji Rêkxerê Koşka Spî bo Karûbarên Rojhilata Navîn û Bakurê Efrîqayê Brett McGurk, Koordînatorê Taybet ê Serokatiyê ji bo Binesaziya Gerdûnî û Ewlekariya Enerjiyê Amos Hochstein, Balyoza Amerîka li Iraqê Alina Romanowski û hejmarek şêwirmendên Wezareta Derve ya Amerîka pêk hatibû, kir.

Di civînê de rewşa siyasî ya Iraqê û pêwendiyên di navbera Herêma Kurdistanê û Bexdayê hatin gotûbêjkirin û tekez li ser çareserkirina kêşeyên di navbera Herêma Kurdistanê û Bexdayê de û girîngiya rola Iraq û Herêma Kurdistanê di derbaskirina wan astengiyên li pêşiya enerjiyê li ser asta cîhanê hate kirin.

Rewşa Herêma Kurdistanê mijareke din a civînê bû û Serok Barzanî bal kişand li ser wê yekê ku divê îsal hilbijartineke paqij û dadperwerane li Herêma Kurdistanê were kirin û ti behaneyek ji bo paşxistina helbijartinan nayê qebûlkirin.

Her wiha Serok Barzanî diyar kir jî, ji bo derbaskirina kêşeyan û piştgîriya Hikûmeta Herêma Kurdistanê, ew xwazyar e ku civîn û hevahengiya di navbera aliyên siyasî de berdewam be. Di derbarê çaksaziyên hêzên Pêşmergeyên Kurdistanê de jî Serok Barzanî piştevaniya xwe bo berdewamiya wan çaksaziyan dubare kir.

Rewşa siyasî ya navçeyê û metirsiya terorê, mijareke din a vê hevdîtinê bû û şanda mêvan tekezî li ser giringiya ewlehî û aramiya Iraq û Herêma Kurdistanê kir.