Di hilbijartinên 14ê Gulanê de girîngiya dengên Kurdan
Diyarbekir (K24) - Hilbijartinên 14ê Gulana 2023an ji aliyê hemû partiyan ve wekî qonaxeke girîng tê nirxandin. Siyasetmedarên Partiya Dad û Geşepêdanê (AK Partî) dibêjin; ji bo berdewamiya reform û gavên demokratîk divê bi taybetî Kurd dîsa dengên xwe bidin AK Partî û Erdogan. Partiyên Kurdistanî jî dibêjin; AK Partî ji reform û demorkasiyê dûr ketiye û ji bo ku Tirkiye dîsa bibe welatekî demokratîk ew dê piştgiriya Kemal Kiliçdaroglu bikin.
Li Tirkiye û Bakurê Kurdistanê di 14ê Gulanê de dê hilbijartinên parlemento û serokomariyê bi hev re bêne kirin. Li gorî nirxandina siyasetmedar, şirovekarên siyasî û lêkolîneran ev her du hilbijartin jî ji aliyê hem desthilatdariyê ve hem jî opozîsyonê ve wekî hilbijartinên dîrokî têne nirxandin.
Siyasetmedarên Partiya Dad û Geşepêdanê (AK Partî) dibêjin; wan dawî li polîtîkayên red û înkarkirina kurdan anîn û ji bo berdewamiya reform, gavên demokratîk û razemeniyan divê Kurd piştgiriya AK Partiyê bikin.
Cîgirê Serokê Rêxistina AK Partiyê li Diyarbekirê Hesen Dogan ji K24ê re ragihand: “Ji bo kurdan jî, ji bo tirkan jî û ji bo umetê jî ev hilbijartineke gelek mezin e. AK Partiyê dawî li înkar û asimilasyona kurdan anî, xizmetên ku li Edîrneyê dike li Colemêrgê jî dike. Ferq û cudahiyê naxe nav welatiyan de, ji ber vê yekê dê kurd dengên xwe bidin AK Partiyê.”
AK Partî, kampanyaya hilbijartinê li ser gavên ku di mijara demokratîkbûna Tirkiye û razemeniyan de avêtine birêve dibe û ji bo pênc salên din ji dengdêran daxwaza piştgiriyê dike. Lê partiyên opûzîsyona Tirkiye û partiyên kurd jî rexneyan li AK Partiyê dikin ku dibêjin; di van salên dawiyê de Tirkiye ji demokrasiyê dûr ketiye û abûrî têk çûye.
Partiya Sosyalîst a Kurdistanê (PSK) jî radigihîne ku ew dê di hilbijartinê de ne piştgiriya Hevpeymana Milet; lê belê piştgiriya Kemal Kiliçdaroglu bikin û dibêjin; bi serokomariya Kiliçdaroglu dê rêya nîqaşkirina pirsgirêka kurd jî vebe.
Serokê Giştî yê PSKê Bayram Bozyel ji K24ê re ragihand: “Îdîaya me ew e ku dê guhertina pergalê bixwe re nermahiyekê jî bîne. Ji ber vê yek pêwîst nake ku opûzîsyon tiştekê jî bike. Dema ku opûzîsyon bibe desthilatdar û destê ji xwe ji daraz û dadweriyê bikişîne dê nermahiyek çêbibe. Heger dawiyê li operasyonan bîne dê nermahiyek çêbibe. Heger dawiyê li zext û girtinan bîne dê nermahiyek çêbibe. Ji van zêdetir tu hêviyeke me yê mezin nîne.”
Aliyên AK Partiyê dibêjin, wan Tirkiye bi her awayî guherand, dawî li polîtîkayên red û înkarkirina kurdan anîn, gavên demokratîk avêtin û Tirkiye kirin welateke demokratîk û dewlemend. Aliyên opûzîsyonê jî dibêjin; kurd û zimanê kurdî hê jî tê redkirin, ji ber polîtîkayên hişk, welat ji demokrasiyê dûr ket û ji bilî aliyên nêzîkî desthilatdariyê aliyên din ên civakê xizan bû. Rewş ev e; gelo dê baweriya dengdêran bi kîjan alî bê? Bersiva vê pirse di 14ê Gulanê de ji aliyê gel ve bê dayîn.