Dadgeha Federalî biryara dana pênc kursiyan ji bo pêkhatan pejirand

Avahiyê Perlemana Kurdistanê
Avahiyê Perlemana Kurdistanê

Navenda Nûçeyan (K24) - Dadgeha Bilind a Federalî ya Îraqê biryara Desteya Dadweriyê ya Hilbijartinên Îraqê ji bo dana pênc kursiyên Perlemana Kurdistanê ji bo pêkhatan di çarçoveya 100 kursiyên perlemanê de pejirand.

Desteya Dadweriyê ya Hilbijartinan, ku girêdayî Encûmena Bilind a Dadweriyê ya Îraqê ye, di bersiva hejmareke skalayan de ku ji aliyê pêkhatên Herêma Kurdistanê ve hatine pêşkêşkirin, biryar da ku di çarçoveya 100 kursiyên Perlemana Kurdistanê de, pênc kursî ji bo pêkhatan bên terxankirin. Yanî 95 kursî dê giştî bin, pênc kursiyên din jî dê girêdayî pêkhatan bin.

Dadgeha Bilind a Federalî ya Îraqê îro (Sêşem, 21.05.2024) biryara Desteya Dadweriyê ya Hilbijartinên Îraqê pejirand. Li dû tekista wê biryarê ku duhî (Duşem, 20.05.2024) derkeftiye; pênc kursiyên pêkhatan bi vî awayî li ser parêzgehên Herêma Kurdistanê tên parvekirin:

1.    Hewlêr: Du kursî (Yek ji bo Kiristiyanan û yek ji bo Tirkmenan)

2.    Silêmanî: Du kursî (Yek ji bo Kiristiyanan û yek ji bo Tirkmenan)

3.    Dihok: yek kursî ji bo Ermenan.

Pêştir Dadgeha Federalî ya Îraqê biryar dabû ku hejmara Kursiyên Perlemana Kurdistanê ji bo 100 kursiyan kêm bike, Komisyona Bilind a Serbixwe ya Hilbijartinan jî li dû wê biryarê ew kursî bi vî awayî li ser parêzgehên Herêma kurdistanê belav kiribûn: 34 kursî ji bo Hewlêrê, 38 kursî ji bo Silêmaniyê, 25 kursî ji Dihokê û sê kursî jî ji bo Helebceyê.

Berdevka Komisyona Bilind a Serbixwe ya Hilbijartinan a Îraqê Cumane Xelay Îro (Sêşem, 21.05.2024) ji K24ê re ragehand, “Piştî biryara Desteya Dadweriyê ya Hilbijartinan, careke din Encûmena Komisyaran bi merema rêkxistina parvekirina 95 kursiyên din ên Perlemana Kurdistanê li ser parêzgehên Herêma Kurdistanê dicive, piştî ku pênc kursî di çarçoveya 100 kursiyan de ji bo pêkhatan hatin terxankirin”.

Ji aliyekî din ve her îro (Sêşem, 21.05.2024) rûniştina yekê ya Dadgeha Federalî ya Îraqê ji bo danûstandinên li ser skalayeke Serokê Hikûmeta Herêma Kurdistanê Mesrûr Barzanî di derheqa parvekirina kursiyên Perlemana Kurdistanê û nehêlana kursiyên kutayan de tê birêvebirin.