Nêzî 600 hezar geştyaran di rojên cejna Qurbanî de serdana Herêma Kurdistanê kiriye

Havîngeha Sîpe li Akrê / Wêne: K24
Havîngeha Sîpe li Akrê / Wêne: K24

Navenda Nûçeyan (K24) - Berdevkê Desteya Geştyariyê ya Herêma Kurdistanê amara giştî ya geştyarên derve û yên navxwe di rojên cejna Qurbanî de eşkere kir û ragehand, “Nêzî 600 hezar geştyaran serdana Herêma Kurdistanê kiriye.”

Berdevkê Desteya Geştyariyê ya Herêma Kurdistanê Îbrahîm Ebdilmecîd îro (Yekşem, 23.06.2024) ji K24ê re ragehand, “Di rojên cejna Qurbanî de, 358 hezar û 331 geştyaran ji derve serdana Herêma Kurdistanê kiriye.”

Îbrahîm Ebdilmecîd herwesa got, “Her di dema bêhnvedana cejna Qurbanî de, zêdetirî 250 hezar geştyarên navxwe serdana cih û deverên geştyarî yên Herêma Kurdistanê kiriye.”

Ev jî di demekê de ye ku berî cejna Qurbanî Desteya Geştyariyê ya Herêma Kurdistanê pêşbînî kiribû ku 300 hezar geştyar serdana Herêma Kurdistanê bikin.

Herwesa Desteya Geştyariyê ya Herêma Kurdistanê li rojên cejna Qurbanî ji bo pêşwazîkirina geştyaran pilaneke taybet hebû û ragehandibû: Tevaya cihên geştyarî, hotel, motel û xwaringeh dê ji bo pêşwazîkirina geştyaran vekirî bin.