دوو بچوکترین گۆڕهەڵکەنی جیهان بناسە

تەمەنیان 8 و 15 ساڵە

K24 – هه‌ولێر:

جەوادی 8 ساڵ و یازانی 15 ساڵ، دوو بچوکترین گۆڕهەڵکەنن لە سووریا و شایەتی زۆرێک لە کارە دڕندانەکانی داعش و کوشتنی کەسانی بێ گوناح دەدەن.

ئەم دوو منداڵە، دەبوو رۆژانە بچنە قوتابخانە، بەڵام بەهۆی هەژاریی  و جەنگی سووریاوە، گۆڕ هەڵدەکەنن و بژێوی ژیانیان پەیدا دەکەن.

هەموو رۆژێک کاتژمێر 6ی بەیانی ئەم دوو منداڵە دەچنە سەر کار و تا خۆرئاوا بوون ناگەڕێنەوە، بۆخۆیان خەڵکی حەلەبن و زۆرێک لە ئەندامانی خێزانەکانیان بەهۆی جەنگ و بۆردومانی ئاسمانی گیانیان لەدەستداوە.

لەبارەی قوربانییەکان، جەواد دەڵێت: "داعش سەری هەموو قوربانییەکانی لێ دەکردەوە، دواتریش تەرمی ژن و منداڵەکانی لە گۆڕەپانەکانی شار هەڵدەواسی".

لەبارەی ژیانی پێش بوونی بە گۆڕهەڵکەن: "لە حەلەب لەگەڵ هاوڕێکانمان بە ئۆتۆمبێل و فڕۆکەی بچووک رۆژانە یاریمان دەکرد، بەڵام ئێستا ئەو یارییە ناکەم چونکە ئەوان هەموویان کوژران".

یازانیش لەگەڵ ماڵی پوور و مامی لە حەلەب کاری جووتیاری کردووە، بەڵام بۆمب و تەقەمەنی ژیانی گۆڕیوە.

لە گێڕانەوەی چیرۆکی خۆی بە ماڵپەڕی دەیلی مەیلی گوتووە: "بۆ هێنانی نان چووم بۆ ماڵی دراوسێیەکمان، کاتێک گەڕامەوە، بینیم ماڵی مامم بۆردومان کرا. گوێم لە هاواری مامم بوو".

"لەگەڵ مامم چوینە سەر ماڵە وێرانەکەی و هەوڵی دەرهێنانی منداڵەکانی ماممان دەدا. مامم توانی منداڵەکانی رزگار بکات و کەسیان نەمردن".

لەبارەی ئەزموونی کارەکەی دەڵێت، ناخۆشترین سات ئەوەیە، دەمووچاوی کەسێکی بێ تاوان دەبینی کە کوشتویانە، دەبێت ئێمە ئەوان بنێژین. هەندێکیان پارچە پارچە کراون و لەناو عەلاگەدا بۆمان دەهێنن".

ئەگەرچی رۆژانە کارێکی زۆر ئەنجام دەدەن، بەڵام تەنها یەک هەزار لیرەی سووری کە دەکاتە نزیکەی یەک دۆلار و نیو پەیدا دەکەن.

جەوادی 8 ساڵ لەبارەی ترس لە کارەکەی دەڵێت: "من ناترسم، ئەوانەی دەمرن ژیانیان تەواو دەبێت".

دەشڵێت: "تەرمی خەڵکی گەورە بە ئامێر (کۆمپرێسەر) دەکۆڵین، بەڵام ئەگەر قوربانیەکە منداڵ بێت، بە خاکەناز گۆڕەکەی دەکێڵین".

خەونی جەواد ئەوەیە، بچێتە قوتابخانە و فێری چاککردنەوەی ئامێری کارەبایی بێت، تاکو بتوانێت پارە پەیدا بکات و کەلوپەلی یاریکردنی پێ بکڕێت.

H.J