گۆرانيبێژێكى ئه‌مه‌ريكى به‌ هۆى ده‌ستدرێژى سێكسييه‌وه‌ ده‌ستگيركرا

ژنێكى ته‌مه‌ن 24 ساڵ سكاڵاى تۆمار كردووه‌

K24 – هه‌ولێر:

پۆليسى فه‌ره‌نسا، كريس براون، گۆرانيبێژى ئه‌مه‌ريكايى به‌ تۆمه‌تى ئه‌نجامدانى تاوانى ده‌ستدرێژى سێكسى ده‌ستگيركرد.

پۆليسى پاريس، رايگه‌ياند، ئه‌و گۆرانيبێژه‌ و دووان له‌ ياريده‌ده‌ره‌كانى و يه‌كێك له‌ پاسه‌وانه‌كانى ده‌ستبه‌سه‌ر كراوون بۆ ئه‌وه‌ى لێكۆڵينه‌وه‌يان له‌گه‌ڵدا بكرێت.

به‌ گوێره‌ى راپۆرته‌ هه‌واڵييه‌كان، ژنێكى ته‌مه‌ن 24 ساڵ سكاڵاى تۆمار كردووه‌ و رايگه‌ياندووه‌، له‌ 15ى ئه‌م مانگه‌دا براون ده‌ستدرێژى سێكسى كردووه‌ته‌ سه‌ر، دواى ئه‌وه‌ى له‌ يانه‌يه‌كى شه‌وانى نزيك له‌ شانزه‌ليزێى پاريس يه‌كدييان بينيوه‌.

ژنه‌كه‌ باسى له‌وه‌شكردووه‌، براون ئه‌وه‌ى بردووه‌ته‌ ژوورێكى هۆتێلێك و له‌وێش ياريده‌ده‌ره‌كانى ده‌ستدرێژييان كردووه‌ته‌ سه‌رى.

براون له‌ 2009شدا به‌وه‌ تۆمه‌تبار كرا، كه‌ ده‌ستدرێژى كردووه‌ته‌ سه‌ر ريهاناى گۆرانيبێژ، كه‌ ئه‌و كاته‌ هاوڕێى يه‌كدى بوون.

به‌و هۆيه‌وه‌، براون به‌ پێنج ساڵ زيندانى و راوێژكارى بۆ ماوه‌ى يه‌ك ساڵ له‌ بوارى توندوتيژى خێزانى و شه‌ش مانگ خزمه‌تكردنى كۆمه‌ڵايه‌تى سزا درا.

هه‌روه‌ها دادگا سزاشى به‌سه‌ردا سه‌پاندبوو، كه‌ بۆ ماوه‌ى 5 ساڵ ده‌بێت 50 پێ له‌ ريهاناوه‌ دوور بێت و ته‌نيا له‌ بۆنه‌كاندا بۆى هه‌بوو، 10 پێ له‌ ريهانا نزيك بكه‌وێته‌وه‌.

سه‌رچاوه‌:RT

ئ.ر