به‌ڵگه‌ فیلم (فیلمی دۆكیومێنته‌ری) به‌شێوه‌یه‌كی گشتی باس له‌ ڕابردوو و ئێستا ده‌كات. دواتر له‌ درێژخایه‌ندا داهاتوو‌یه‌كی به ‌نرخ به‌رهه‌مدێنێت، چونكه‌ ئه‌وه ‌به‌ڵگه‌ فیلمه‌، ته‌نيا ڕووداوه‌كان به‌نه‌مری ده‌هێڵێته‌وه‌. به‌ڵگه‌فیلم ته‌نيا ڕووداوه‌كان پیشان نادات، به‌ڵكوو كاری ئه‌و زۆر به‌قوڵتر ڕۆچوونه‌ به‌ نێو ڕووداوه‌كان و بابه‌ته‌كا‌ندا. به ‌تایبه‌ت بۆ كۆمه‌ڵى كورديی له‌هه‌موو ئاسته‌كانیدا پێداویستییه‌كی حه‌تمییه‌، پرسی ئه‌وه‌ی ئێمه‌ كێین و چین؟ و گه‌ڕان به‌ دواى پرسياره‌كانى په‌يوه‌ست به‌ شوناس و رابردوو و داهاتووى گه‌لێكه‌ له‌ چه‌قى كێشه‌كانى رۆژهه‌ڵاتى ناوه‌ڕاستدا. زۆر جار فیلمی به‌ڵگه‌نامه‌یی وه‌ك ئامرازێكه‌، ده‌توانێت به‌شدارییه‌كی به‌رچاوی هه‌بێت له‌ درووستكردنی كۆمه‌ڵ و تاكێكی ته‌ندرووست و خاوه‌ن ئیراده‌ی نه‌ته‌وه‌یی. چونكه‌ به‌ڵگه‌فیلم ده‌توانێت هاوكار و هانده‌رێكی به‌هێز بێت بۆ ده‌سته‌به‌ركردنی كۆمه‌ڵ‌ و تاكێكى هوشیار. له‌و سۆنگه‌يه‌وه‌، كوردستان24‌ مه‌به‌ستييه‌تى له‌ رێى به‌رهه‌مهێنان و نمايشكردنى به‌ڵگه‌فيلمى كوالێتى ئاست به‌رزه‌وه‌ خزمه‌ت به‌ كايه‌ى رۆشنبيرى، هونه‌ر و مێژوويى كورد بكات.