گوزەرێک بە کۆڵانه‌كانی یەکێک لەگەڕەکە دێرینەکانی دەربەندیخان

K24 - ده‌ربه‌ندیخان:

(کانی توو) ناوی ئەو گەڕەکە کۆنەی قەزای دەربەندیخانە کە ناوەکەی لە بوونی 3 داری توو لەدەوری کانیەکەوە هاتووە.

مێژووی بنیات و دروستبوونی ئەم گەڕەکە دەگەڕێتەوە بۆ سەرەتای ساڵانی شەستی سەدەی رابردوو، لە دەوری ئەو کانی و دارتووانە، کە دواتر بوو بە سەرەتایەك بۆ دروستبوونی قەزای دەربەندیخانی ئێستا.

هۆکاری گەشەی خێرای گەڕەکی (کانی توو) لەو سەردەم و جێگایەدا بۆ دوو هۆکاری سەرەکی دەگەڕێتەوە، یەکەمیان سەرەتای دەستکردن بە درووستکردنی پرۆژەی  بەنداوی دەربەندیخان کە بەو هۆیەوە دەستی کاری زیاتر و ئاوەدانی روویلێکرد بەهۆی هاتنی خەڵکی ناوچەکانی دەوروبەری دەربەندیخان بەمەبەستی کارکردن لەو پرۆژەدا.

هۆکاری دووەم لە ئەنجامی بۆردومانی گوندی (سەلیم پیرک) و دواتر کۆچی ماڵەکانی ئەو گوندە کە لەبەردەم تونێلی دەربەندیخان نیشتەجێ ببوون بۆ نێو گەڕەکی کانی توو، ئەو بۆردومانە کە لەلایەن حکوومەتی ئەو کاتەی عێراقی بوو کە ئەو کات سەرەتای هەڵگیرسانی شۆڕشی ئەیلوول بووە لەدەربەندیخان لە 11/9/1961 کە بە شۆڕشی (کەواشۆڕەکان) ناسراوبووە.

شێوازی درووستبوونی کۆڵان و گەڕەکەکانی کانی توو ناڕێکە و رەچاوی شێوازی ئەندازیاری و جێگای پێویست بۆ پرۆژەی خزمەتگوزاری کە گرنگترینیان خوێندنگە و بنکەی تەندرووستی و ئەوانیتریش نەکراوە بە هۆکاری ئەوەی لەسەردەمی بیناتنانی گەڕەکەکە دەربەندیخان ناحیە بووە و  فەمانگەکانی شارەوانی و زەویوزار بوونیان نەبووە، تا ئەو دەمەی لەساڵی 1970 بەبڕیارێکی حکوومەتی عێراق دەربەندیخان كراوه‌ته‌ قه‌زا.

لەئێستادا (کانی توو) بووە بە یەکێک لەگەڕەکە کۆنەکانی شار و لەبەر کەمی نرخی کرێی خانووەکانی بەشێك لەو خێزانە عەرەبە ئاوارانەی ناوەڕاست و خوارووی عێراقی لێ نیشتەجێیە.

ئامادەکردن و فۆتۆ: کاروان یارە - کوردستان 24