فیلتەری سناپچات کچێک دووچاری نەخۆشی دەروونیی دەکات
K24 – ههولێر:
کچێک ئەوەندە ئالوودەی فیلتەرەکانی سناپچات بووە، ناتوانێت لە سەر جێگای نووستنەکەی هەڵبستێ و تەنانەت سەیری ئاوێنەش بکات.
مایسی هەیزلودی تەمەن 19 ساڵ، لە مانگی دووەوە، بەرنامەی سناپچاتی داگرتووە و رۆژ دوای رۆژ زیاتر ئالوودەی بووە.
ئێستا ئەو کچە دووچاری حاڵەتێک بووە کە شێوە راستەقینەکەی خۆی لەبەرچاو کەوتووە و رقی لە رووخسارییەتی بەبێ فیلتەر.
لە لێدوانێکی بۆ رۆژنامەی مێترۆ، ئەو کچە رایگەیاندووە: "ئەو فیلتەرانەم زۆر لا جوان بوو کە چاو و برژانێکی گەورەتر، لوتێکی رێک و رووخسارێکی بێ خەوشی دەدامێ".
راشیگەیاندووە: "ئێستا ئەوندە بەو فیلتەرانە ئالوودە بووم، ناتوانم لەگەڵ وێنە راستەقینەکەی خۆم هەڵ بکەم".
ئاماژەی بەوەشکردووە: "ئێستا لە ژوورەکەم نایەمە دەرەوە، ماکیاژیش ناکەم چونکە دەزانم ئەگەر خەڵک لە دەرەوە بمبینن، دەزانن کە من بە بەروارد بە وێنەکانی سناپچاتم، ناشرینم".
مایسی چیدی متمانەی بە خۆی نەماوە و داواش دەکات خەڵک وێنەی راستەقینەی خۆیان لە فیلتەرەکاندا ون نەکەن.
سناپچات تۆڕێکی کۆمەڵایەتییە و بەکاربەرێکی زۆری هەیە، تیایدا لە رێگای فیلتەری جیاواز دەکرێت شێوەی رووخسار بگۆڕدرێت.
H.J