ئه‌مه‌ریكا داعشه مه‌ترسیداره‌كانی له هه‌سه‌ده وه‌رگرته‌وه
K24- هه‌ولێر:
رۆژنامه‌ی واشنتن پۆست بڵاویكرده‌وه، ئه‌مه‌ریكا، ئه‌و گه‌وره به‌رپرسانه‌ی داعشی له هه‌سه‌ده وه‌رگرتووه‌ته‌وه، كه له زیندانه‌كانی باكووری سورویا بوون.
رۆژنامه‌كه ئاشكرایكردووه، ئه‌مه‌ریكا نزیكه‌ی 40 زیندانیكراوی داعشی له هێزه‌كانی سووریای دیموكرات(هه‌سه‌ده) وه‌رگرتووه‌ته‌وه، كه پله‌یان ئه‌میر بووه له ریزی چه‌كدارانی داعش و دوان له‌وان به‌ریتانین و یه‌كێكیان ناوی ئه‌لكسێنده‌ر كوتی و دووه‌میان ناوی شافعی شێخه.
رۆژنامه‌كه له زاری به‌رپرسانی سه‌ربازی ئه‌مه‌ریكاوه، بڵاویشیكردووه‌ته‌وه، ئه‌و ده‌ستگیركراوانه‌ی داعش گواستراونه‌ته‌وه بۆ عێراق.
روونیشیكردووه‌ته‌وه، هه‌سه‌ده ژماره‌ی پاسه‌وانی زیندانه‌كانی كه‌مكردووه‌ته‌وه و ئه‌مه‌ریكا ترسی ئه‌وه هه‌بووه، ئه‌و سه‌ركردانه‌ی داعش له زیندان رابكه‌ن و جارێكی دیكه بگه‌ڕێنه‌وه ریزی چه‌كدارانی داعش.