كه‌لار.. لە رووداویکی هاتووچۆ ژن و مێردێك گیانیان لەدەستدا

به‌ وێنه‌ و ڤیدیۆ.. چوار كه‌سی دیكه‌ش برینداربوون
kurdistan24.net

K24 - گه‌رمیان:

له‌ رووداوی هاتووچۆدا، له‌سه‌ر ڕێگای نێوان  کەلار ـ کفری ، 6 کەس برینداربوون، كه‌ برینی دووانیان سه‌خت بوو و دوای گەیاندنیان بۆ نەخۆشخانە، گیانیان لەدەست داوە.

به‌ڕێوه‌به‌رایه‌تی پۆلیسی گه‌رمیان، ئه‌مڕۆ یه‌كشه‌ممه‌، 23ی حوزه‌یرانی 2019 رایگه‌یاند، ئه‌وانه‌ی گیانییان له‌ده‌ست داوه‌ هاوسه‌ری یه‌كدین به‌ناوه‌كانی (عه‌دنان فه‌تاح محه‌مه‌د) و (سوهه‌یبە ئه‌حمه‌د سه‌عید).

رووداوه‌كه‌ له‌سه‌ر ڕێگای کفری - ناحییەی سەرقەڵا بووه‌ كه‌ دوو ئۆتۆمبێل لەجۆرەکانی نیسان دەبڵ و نیسان پاتڕۆڵدا بووه‌، لەئەنجامدا شۆفێرو سەرنشینێکی نیسان دەبڵەکە گیانیان لەدەستدا كه‌ هاوسه‌ری یه‌كتر بوون.

هه‌ر له‌و رووداوه‌كه‌دا، منداڵێك و سێ سه‌رنشینی نیسان پاترۆله‌كه‌ش برینداربوون و بۆ مه‌به‌ستی وه‌رگرتنی چاره‌سه‌ری، ره‌وانه‌ی نه‌خۆشخانه‌ی فریاكه‌وتنی شه‌هید مه‌لا هه‌ژار كراون له‌ كه‌لار.

چاره‌سه‌ری پێویست بۆ برینداران كراوه‌ و شۆفێری نیسان پاترۆله‌كه‌ش به‌ بڕیاری دادوه‌ر و به‌ گوێره‌ی مادده‌ی 24ی هاتووچۆ، به‌ندكراوه‌.