مه‌كته‌بی سیاسی یه‌كێتی بۆ تاوتوێكردنی چه‌ند پرسێك كۆده‌بێته‌وه
K24 – سلێمانی:
بڕیاره ئه‌مڕۆ مه‌كته‌بی سیاسی یه‌كێتی نیشتمانی كوردستان له سلێمانی بۆ تاوتوێكردنی چه‌ند پرسێك كۆببێته‌وه.
په‌یامنێری كوردستان24 له سلێمانی، رایگه‌یاند، كۆبوونه‌وه‌كه كاتژمێر 11:00ی پێش نیوه‌ڕۆ ده‌ستپێده‌كات.
گوتیشی: بڕیاره له كۆبوونه‌وه‌كه، گفتوگۆ بکرێت لەبارەی رێككه‌وتنی سیاسی لەگەڵ پارتی دیموكراتی كوردستان.
هه‌روه‌ها گوتی: پرسی پارێزگاری كه‌ركووك قسه‌ی له‌باره‌وه ده‌كرێت و هه‌ڵوێستی كۆتایی یه‌كێتی له‌و رووه‌وه بۆ رایگشتی و پارتی دیموكراتی كوردستان ده‌خرێته‌ڕوو.
كۆبوونه‌وه‌ی ئه‌مڕۆی یه‌كێتی له سلێمانی دوای ئه‌وه دێت، كه بڕیار بوو دوێنێ ئه‌و كۆبوونه‌وه‌یه له هه‌ولێر بكرێت، به‌ڵام دواخرا بۆ ئه‌مڕۆ و شوێنه‌كه‌شی گواسترایه‌وه بۆ سلێمانی.