سێ باندی تاوانكاری لە دەڤەری راپەڕین دەستگیر كران
K24 - رانیە
هێزەکانی پۆلیسی راپەڕین سێ باندی تاوانکاریان دەستگیر كرد، کە تاوانی جۆراو جۆریان ئەنجام داوە و هەوڵیانداوە ئاسایش و ئارامی هاووڵاتیان بشێوێنن.
رائید شۆڕش ئیسماعیل، وتەبێژی پۆلیسی راپەڕین بە کوردستان24ی راگەیاند: "ئەو کەسانە دەستگیر كراون سێ باندی جیاوازن، باندێکیان کاریان لەسەر دزینی ئۆتۆمبێل و پاشان ساغکردنەوەی کردووە، یەکێکی تر لەو باندانە کاری بازرگانی و بەکارهێنانی مادەی هۆشبەریان لە سنووری قەزای پشدەر کردوە، ھەروەھا باندێكی دیكەش هەستاون بە تەقەکردن لە خەڵک و ماڵی هاووڵاتیان و هەوڵیانداوە ئاسایش و ئارامی هاووڵاتیان بشێوێنن".
وتەبێژی پۆلیسی راپەڕین ئاشكرای كرد: "ژمارەیەک لە دەستگیر کراوەکان پێشتر فەرمانی گرتنیان هەبووە و دانیان بە تاوانەکانیان ناوەو لێکۆڵینەوەی زیاتریان لەگەڵ دەکرێت".
دەستگیر کردنی ئەو باندە تاوانکاریانە لە کاتێکدایە پێشر ژمارەیەک هاووڵاتی لەسەر دزینی ئۆتۆمبێلی جۆری تۆیۆتا هایلۆکس ناسراو بە (مەرزیە) و تەقەکردن لێیان سکاڵایان لە پۆلیس تۆمار کردبوو.
ھ.م
