عێراق ئیدانه‌ی په‌لاماردانی دوو مزگه‌وته‌كه‌ی نیوزله‌ندای كرد
K24 – هه‌ولێر:
وه‌زاره‌تی ده‌ره‌وه‌ی عێراق، به توندی ئیدانه‌ی ئه‌و په‌لاماره‌ی كرد، كه به‌یانی ئه‌مڕۆ كرایه سه‌ر دوو مزگه‌وتی نیوزله‌ندا و له ئاكامدا 49 هاووڵاتی موسڵمان گیانیان له‌ده‌ستدا و 48ی دیكه بریندار بوون.
گوته‌بێژی وه‌زاره‌تی ده‌ره‌وه‌ی عێراق، ئه‌حمه‌د سه‌حاف رایگه‌یاند، به‌غدا به گرنگییه‌وه چاودێری ورده‌كاری په‌لاماره تیرۆریستییه ئازارده‌ره‌كه‌ی نیوزله‌ندا ده‌كات، كه كرایه سه‌ر نوێژخوێنانی دوو مزگه‌وتی كرایست چرچ و ئه‌و په‌لاماره به توندترین شێوه ئیدانه ده‌كات.
هه‌روه‌ها رایگه‌یاندووه، ئه‌و په‌لاماره تیرۆریستییه سه‌لماندی كه جیهان له تیرۆر پارێزراو نییه و ته‌نیا رێگه‌ی به‌رده‌م جیهان ئه‌وه‌یه، هه‌وڵه‌كانی یه‌كبخات بۆ زاڵبوون به‌سه‌ر تیرۆردا.
جگه له عێراق ده‌یان وڵات و كه‌سایه‌تی په‌لاماره‌كه‌یان به تیرۆریستی وه‌سفكردووه و ئیدانه‌یان كردووه. له‌وانه، ئێران، توركیا، ئیمارات، به‌ریتانیا.