به‌غدا.. خۆپیشانده‌رێك به‌ مۆلۆتۆڤ ئاگر له‌ جه‌سته‌ی پۆلیسێك به‌رده‌دات

گرته‌ ڤیدیۆییه‌كه‌ له‌لایه‌ن به‌ڕێوه‌به‌رایه‌تی هه‌واڵگری به‌غدا بڵاوكراوه‌ته‌وه‌
kurdistan24.net

K24 - هه‌ولێر:

به‌ گوێره‌ی گرته‌یه‌كی ڤیدیۆیی، له‌ خۆپیشاندانه‌كانی دوێنێ سێشه‌ممه‌، 1ی تشرینی یه‌كه‌م/ ئۆكتۆبه‌ری 2019، خۆپیشانده‌رێك، به‌ مۆلۆتۆڤ ئاگر له‌ جه‌سته‌ی ئه‌ندامێكی هێزه‌ ئه‌منییه‌كان به‌رده‌دات.

به‌ڕێوه‌به‌رایه‌تی هه‌واڵگری گرته‌ ڤیدیۆییه‌كه‌ی بڵاوكردووه‌ته‌وه‌ و ئاماژه‌ی به‌وه‌ كردووه‌، یه‌كێك له‌ خۆپیشانده‌ران له‌ گۆڕه‌پانی ته‌حریری به‌غدا، له‌ پشت حاویه‌ی زبڵ خۆی حه‌شارداوه‌ و مۆلۆتۆڤێك ئاراسته‌ی ئه‌ندامێكی هێزه‌ ئه‌منییه‌كان ده‌كات و به‌هۆیه‌وه‌ جه‌سته‌ی ده‌سووتێت.

گرته‌ ڤیدیۆییه‌كه‌، كاتژمێر 6:38ی خووله‌كی ئێواره‌، له‌لایه‌ن كامێراكانی چاودێری به‌ڕێوه‌به‌رایه‌تی هه‌واڵگری له‌ به‌غدا تۆماركراوه‌ و به‌ڕێوه‌به‌رایه‌تییه‌كه‌ش بڵاویكردووه‌ته‌وه‌.

له‌ خۆپیشاندانه‌كانی دوێنێ به‌غدا، خۆپیشانده‌رێك كوژرا، به‌هۆی توندوتیژییه‌كانیش، له‌ ریزی هێزه‌ ئه‌منییه‌كان و خۆپیشانده‌ران بریندار هه‌ن و وه‌زاره‌تی ته‌ندرووستیش رایگه‌یاند، زیاتر له‌ 200 كه‌س برینداربوونه‌.

ئ. م