پشكی ھەرێمی كوردستان لە بەغداوە رەوانەی ھەولێر دەكرێت

وادەی ناردنی ئاشكرا دەكرێت

K24 - ھەولێر

پەرلەمانتارێكی عێراق ئاشكرای دەكات سبەی حكوومەتی عێراق پشكی مانگانەی ھەرێمی كوردستان رەوانەی ھەولێر دەكات و ھیچ كێشەیەك لە ناردنی رووینەداوە.

ئەحمەد سەفاڕ، ئەندامی لیژنەی دارایی لە ئەنجوومەنی نۆێنەرانی عێراق بە كوردستان24ی راگەیاند: "ھیچ گرفتێك لە ناردنی پشكی ھەرێمی كوردستان نییە و تەنھا ئەم مانگە كێشەیەكی تەكنیكی ھەبوو ئەویش چارەسەركراوە و لەم دوو رۆژەدا پارەكە رەوانی ھەولێر دەكرێت".

گوتیشی: "ئەو پارەیەی وەك پشكی مانگانە بۆ ھەرێمی كوردستان دیاركراوە تا كۆتایی ساڵ بێ كێشە دەنێردرێت و ھیچ كێشەیەك بۆ دابەشكردنی مووچەی فەرمانبەرانی ھەرێمی كوردستان دروست نابێت".

لەلایەكی دیكە هۆشیار عەبدوڵڵا، ئەندامی لیژنەی دارایی لە پەرلەمانی عێراق لە راگەیەندراوێكدا ئاشكرای كرد: "سەبارەت بە دواکەوتنی ناردنی پشکی هەرێم بۆ ئەو مانگە قسەم لەگەڵ دکتۆر فوئاد حوسێن وەزیری دارایی عێراق  کرد، پێی راگەیاندم کە سبەی سێشەممە پشکی هەرێم دەنێردێت".

ئەو پەرلەمانتارە لە زاری وەزیری داواییەوە دەڵێ: "هیچ خەلەلێک نییە، بەڵکو مانگانە کە وەزارەتی دارایی کاتێک دەست دەکات بە دابەشکردنی مووچە چەند رۆژێکی پێدەچیت دواکەوتنی چەند رۆژێک مانای بوونی گرفت یا کێشە نییە".

ھەر سەبارەت بەم پرسە دوێنێ ئاوات شێخ جه‌ناب، وه‌زیری دارایی و ئابووریی حكوومه‌تی هه‌رێمی كوردستان له‌ روونكردنه‌وه‌یه‌كدا گوتی: "ئێمه‌ وه‌ك وه‌زاره‌تی دارایی هه‌رێم، له‌ دابه‌شكردنی مووچه‌ به‌رده‌وامین، به‌ڵام تا ئێستا پاره‌ له‌ به‌غداوه‌ نه‌گه‌یشتووه‌".

گوتیشی: "به‌رنامه‌ی دابه‌شكردنی مووچه‌ی فه‌ر‌مانبه‌ران هیچ گۆڕانكارییه‌كی به‌سه‌ردا نه‌هاتووه‌ و هه‌ر كاتێك به‌غدا پاره‌ی نارد، به‌ گوێره‌ی ئه‌و خشته‌یه‌ی دانراوه‌، مووچه‌ دابه‌ش ده‌كرێت".

له‌كاتێكدا مانگانه‌ بڕی 454 ملیار دینار بۆ فه‌رمانبه‌رانی هه‌رێم و زیاتر له‌ 68 ملیار دیناریش بۆ هێزه‌كانی پێشمه‌رگه‌ی كوردستان له‌ بودجه‌ی گشتی عێراق جێگیر كراوه‌ و تا ئێستا مانگانه‌ به‌غدا ئه‌و بڕه‌ پاره‌یه‌ ده‌نێرێت، كه‌ مووچه‌ی فه‌رمانبه‌رانی پێ دابین ده‌كرێت، به‌ڵام بۆ ئه‌م مانگه‌، چه‌ند رۆژێكه‌ گه‌یشتنی ئه‌و بڕه‌ پاره‌یه‌ له‌ به‌غداوه‌، دوا كه‌وتووه‌.

ھ.م