عەبدولمەھدی ژمارەیەك فەرماندەی سەربازیی دوور دەخاتەوە
K24 - ھەولێر
سەرۆك وەزیرانی عێراق ژمارەیەك فەرماندەی سەربازیی دوور دەخاتەوە و 10ھەزار سەربازی عێراقیش دەگەڕێندرێنەوە سەر كارەكانیان.
سەرچاوەیەک لە حکوومەتی عێراق رایگەیاند، عادل عەبدولمەهدی، فەرماندەی هێزە چەکدارەکانی عێراق هەریەک لە فەرماندەی فیرقەی 11 و فەرماندەی لیوای 45 و فەرماندەکانی پۆلیسی پارێزگاکانی بابل، نەجەف، زیقار ، موسەننا و قادسییەی لەکارەکانیان لاداوە.
ئاماژەی بەوەشدا، لەکارلادانی ئەو فەرماندە سەربازیی و ئەمنییانە لە ئەنجامی لێکۆڵینەوە لە خۆپیشاندانەکان دێت.
لەلایەكی دیكە وەزارەتی بەرگریی عێراق رایگەیاند، فەرمانیان دەرکردووە بۆ گەڕاندنەوەی زیاتر لە 10 ھەزار سەرباز بۆ سەر ئەركەكانیان کە پێشتر لە ئەركەكانیان دوورخرابوونەوە.
گەڕاندنەوەی ئەو سەربازانە بەشێکە لەو 108 ھەزار سەربازەی کە پێشتر دوورخرابوونەوە و حکوومەت لە ھەوڵی گەڕاندنەوەیاندایە بۆ ئەرکەکانیان.
ئەو سەربازانە پێشتر بەھۆی جێھێشتنی پێگە و ئەرکەکانیان لە کاتی شەڕی داعش لە ساڵی 2014دا، دوورخراونەتەوە.
ھ.م