هێزی سەربازی رەوانەی زیقار و بەسڕە دەکرێت

K24 - ھەولێر

خۆپیشاندان و ناڕەزایەتییەکانی بەغدا و شارەکانی دیکەی عێراق بەردەوامن و هێزی سەربازی رەوانەی زیقار و بەسرە دەکرێت.

لە درێژەی زنجیرەی خۆپیشاندان و ناڕەزایەتییەکانی عێراق، لە بەغدا بەهۆی گازی فرمێسکڕێژەوە 13 کەس تووشی هەناسە تەنگی بوون، ھەروەھا لە واست و زیقاریش، پێکداهەڵپژان لەنێوان خۆپیشاندەران و هێزە ئەمنییەکان دروست بوو، پزیشکێک و کارمەندێکی تەندروستیش لە ناسریە کوژران.

هاوکات، بۆ پاراستنی گرتووخانەکان، 500 سەرباز بۆ زیقار و 150 سەربازی دیكەش بۆ بەسرە رەوانە کران.

بەگوێرەی دوایین ئاماری قوربانیانی خۆپیشاندانەکانیش تا ئێستا، 433 کەس کوژراون و نزیکەی 20 هەزاری دیکەش برینداربوون.