یه‌كێتی ئه‌وروپا سزای به‌سه‌ر توركیادا سه‌پاند
K24- هه‌ولێر:
یه‌كێتی ئه‌وروپا سزای به‌سه‌ر توركیادا سه‌پاند، ئه‌مه‌ش به‌هۆی هه‌وڵه‌كانی ئه‌نقه‌ره بۆ دۆزینه‌وه‌ی سه‌رچاوه‌ی نویی وزه له رۆژهه‌ڵاتی ده‌ریای سپی ناوه‌ڕاست، كه به پێشێلكردنی سه‌روه‌ری خاكی قوبرس داده‌نرێت. بڕیاریشه ئه‌مشه‌و سزاكان رابگه‌یه‌ندرێن.
دوای ئه‌وه‌ی توركیا ماوه‌یه‌كه هه‌وڵه‌كانی بۆ دۆزینه‌وه‌ی سه‌رچاوه‌ی نوێی وزه له ئاوه‌كانی رۆژهه‌ڵاتی ده‌ریای سپیی ناوه‌ڕاست، كه به پێشێلكردنی سه‌روه‌ری قوبرس داده‌نرێت، وه‌زیرانی ده‌ره‌وه‌ی وڵاتانی ئه‌وروپا كۆبوونه‌وه و بڕیاری سه‌پاندنی سزای ئابووری به‌سه‌ر توركیادا سه‌پاند.
هه‌روه‌ها بڕیاردرا، یه‌كێتی ئه‌وپا هاوكارییه داراییه‌كانی بۆ توركیا كه‌م بكاته‌وه و دانوستانه‌كانی په‌یمانی ئاسمانیش له‌گه‌ڵ ئه‌نقه‌ره راده‌گیرێن و دیداره‌كانیش له ئاستی باڵادا له‌گه‌ڵ ئه‌نقه‌ره هه‌ڵده‌په‌سێرن و رێگه‌ش به بانكی نێوده‌وڵه‌تی ئه‌وروپا نادرێت، پاره به قه‌رز بداته توركیا.
یه‌كێتی ئه‌وروپا هۆشداریشی دایه توركیا، كه ئه‌گه‌ر ده‌ست له گه‌ڕان به‌دوای نه‌وت و گاز له ئاوه‌كانی رۆژهه‌ڵاتی ده‌ریای ناوه‌ڕاست هه‌ڵنه‌گرێت و له‌سه‌ر پێشێلكردنی سه‌روه‌ری قوبرس به‌رده‌وام بێت، سزای دیكه‌ش به‌سه‌ر ئه‌نقه‌ره‌دا ده‌سه‌پێنێت، كه كۆمپانیاكانی گه‌ڕان به‌دوای سه‌رچاوه‌كانی وزه‌ش له‌و سزایانه به‌ده‌ر نابین.
ئه‌مه‌ش هاوكاته له‌گه‌ڵ ئه‌وه‌ی هه‌ر ئه‌مڕۆ وەزیری دەرەوەی ئەمریکا رایگەیاند بەهۆی کڕینی سیستەمی بەرگریى دژه مووشكی ئێس 400 گەمارۆى ئابوورى بەسەر تورکیادا دەسەپێنن.
مایك پۆمپێیۆ، وه‌زیری ده‌ره‌وه‌ی ئه‌مریكا گوتی: خۆی و دۆناڵد ترەمپ، سه‌رۆكی وڵاته‌كه‌ی بە گوێرەی یاساکانی ئەمریکا کاردەکەن و یاسا چ بڕیارێك بدات، ئیدارەکەیان جێبەجێی بکات.
ئه‌م گوتانه‌ی پۆمپێیۆ له لێدوانێكدا بۆ رۆژنامه‌ی واشنتن پۆستی ئه‌مه‌ریكیدا هاتوون و دووپاتی کردەوە، بەهۆی کڕینی سیستەمی بەرگری ئێس - 400 گەمارۆ بەسەر تورکیا دەسەپێنن.
دوێنیش ئاژانسی بلۆمبێری بڵاویکردەوە، ئیدارەی ئەمریکا ئامادەکاری بۆ سەپاندنی گەمارۆی ئابووری بەسەر تورکیادا دەکات.
ئه‌مه‌ش له‌كاتێكدایه، تورکیا بەردەوامە لە وەرگرتنی پارچەکانی ئێس - 400 و ئەمڕۆش هەشتەمین کاروان گەیشتە فڕۆکەخانەی سەربازی ئەنقەرە.
H.B