توێژینەوەیەک: فشاری دەروونی دەبێتە هۆی چەندین نەخۆشی سیستمی بەرگری

چۆن خەم و فشاری دەروونی، تەندروستی ریخۆڵەکان تێکدەدەن؟

K24 – هه‌ولێر:

زانایان بەردەوامن لە دۆزینەوەی بەڵگەی ئەوەی، کە بەکتریاکانی ناو ریخۆڵەکانمان کاریگەرییان لەسەر تەندروستی گشتیمان دەبێت و دوژمنی ریخۆڵەکانیش فشاری دەروونی و خەمۆکییە.

توێژینەوەیەکی نوێ کە لەسەر مشکی تاقیگە ئەنجامدراوە ئاشکرایکردووە، فشارە کۆمەڵایەتییەکان کاردەکەنە سەر رەفتار و پێکهاتەی بەکتریاکانی ناو ریخۆڵەکان، ئەمانەش کار دەکەنە سەر سیستمی بەرگری.

تێكچوونی سیستمی بەرگری کار دەکاتە سەر چەند نەخۆشییەکی بەرگری کە بە Autoimmune disorders ناسراوون و لە جیهاندا، لە هەر پێنج کەسێک، یەکێکیان بەدەست یەکێک لە نەخۆشییەکانی تێکچوونی بەرگرییەوە دەناڵێنێت.

لە تاقیکردنەوەکە، پزیشکان دوو گروپی مشکییان هێنا، بۆ ماوەی 10 رۆژ فشاری رۆژانەیان خستە سەر گروپی یەکەم و گروپی دووەم بە بێ فشار بوون. لە ئەنجامدا بۆیان ئاشکرا بوو، بەکتریاکانی بیلۆفیلا و دێهالۆباکتریۆم کە هۆکاری نەخۆشییەکانی سیستمی بەرگرین گۆڕانیان بەسەردا هاتووە و چالاک بوون.

ئەم جۆرە بەکتریایانە بە هۆی فشار، هێرش دەکەنە سەر شانەکانی لەش و دووچاری هەوکردنیان دەکەن، سیستمی بەرگریش ناچار هێرشیان دەکاتە سەر و وەکو نەیارێک تەماشایان دەکات.

ئۆرلی ئاڤنی، پسپۆڕی سیستی بەرگری مرۆڤ لە زانکۆی بار ئیلان لە ئیسرائیل لەبارەی توێژینەوەکەیان رایگەیاند: "ئێمە ئاشکرامان کردووە، پەیوەندییەکی زۆر بەهێز لە نێوان فشاری دەروونی و رەفتار و جووڵەی میکرۆب و زیندەچەکانی ناو لەشی مرۆڤ هەیە".

دیارترین ئەو نەخۆشییانەی بەهۆی تێکچوونی سیستمی بەرگری دووچانمان دەبن بریتین لە:

باداری جوومگەکان

هەوکردنی ریخۆڵەکان

شەکرە

تێکچوونی رژێنی دەرەقی

پێشتریش توێژینەوەکان ئەوەیان ئاشکرا کردبوو کە فشاری دەروونی کاریگەری زۆری لەسەر جووڵەی ریخۆڵەکان هەیە و بە یەکێک لە هۆکارەکانی نەخۆشییەکانی کۆڵۆن، گەدە، دڵ و ریخۆڵەکان دەزانرێت.

Forbes

H.J