مۆسكۆ: ئـه‌مـه‌ریـكـا خـیـانـه‌تـی لـه‌ كـورد كـرد

ده‌یویست كورد به‌ ته‌نیا شه‌ڕ بكه‌ن

K24 – هه‌ولێر:

گوته‌بێژی كۆشكی سه‌رۆكایه‌تیی رووسیا(كرملین)، دیمتری بیسكۆڤ، رایگه‌یاند، ئه‌گه‌ر هێزه‌ كوردییه‌كان له‌ باكووری سووریا نه‌كشابانه‌وه‌، خۆیان له‌به‌رده‌م هێرشی سوپای توركیا ده‌بینیه‌وه‌.

گوتیشی: ئه‌مه‌ریكا هانی كوردی ده‌دا شه‌ڕی سوپای توركیا بكه‌ن.

هه‌روه‌ها گوتی: ئه‌مه‌ریكا خیانه‌تی له‌ كورد كرد و به‌ ته‌نیا به‌جێی هێشتن.  

روونیشی كرده‌وه‌، ئه‌گه‌ر كورده‌كان پاشه‌كشه‌یان نه‌كردبا، پۆلیسی سه‌ربازیی رووسیا و سوپای سووریا به‌ ته‌واوی له‌ ناوچه‌كه‌ ده‌كشانه‌وه‌ و ته‌نیا هێزه‌ كوردییه‌كان ده‌مانه‌وه‌ بۆ به‌رهه‌ڵستیكردنی هێرشه‌كه‌ی توركیا.

ئه‌و وتانه‌ی دیمتری بیسكۆڤ، دوای ئه‌وه‌ دێن، كه‌ دوێنێ هه‌ریه‌ك له‌ ڤلادیمێر پوتن، سه‌رۆكی رووسیا و ره‌جه‌ب ته‌یب ئه‌ردۆغان، سه‌رۆكی توركیا له‌ سوچی بۆ تاووتوێكردنی ره‌وشی سووریا و رۆژئاوای كوردستان، كۆبوونه‌وه‌. 

دوای چه‌ند كاتژمێرێك له‌ كۆبوونه‌وه‌كه‌یان، پوتن و ئه‌ردۆغان كۆنفڕانسێكی رۆژنامه‌وانیان ئه‌نجام دا و رایانگه‌یاند، گه‌یشتوونه‌ته‌ رێككه‌وتن. دواتر سێرگی لاڤرۆڤ، وه‌زیری ده‌ره‌وه‌ی رووسیا ناوه‌ڕۆكی رێككه‌وتنه‌كه‌ی به‌ رووسی و مه‌ولود چاوش ئۆغلۆ، وه‌زیری ده‌ره‌وه‌ی توركیا، ناوه‌ڕۆكی رێككه‌وتنه‌كه‌ی به‌ توركی خوێنده‌وه‌.

ده‌قی یادداشتی له‌یه‌كگه‌یشتنی توركیا و رووسیا (سوچی، 22ی ئۆكتۆبه‌ری 2019)

سه‌رۆكی كۆماری توركیا، ره‌جه‌ب ته‌یب ئه‌ردۆغان و سه‌رۆكی رووسیا، ڤلادیمێر پوتن له‌سه‌ر ئه‌م خاڵانه‌ رێككه‌وتن:

1-هه‌ردوولا پابه‌ندی خۆیان به‌ پاراستنی یه‌كپارچه‌یی سیاسی و سه‌لامه‌تیی هه‌رێمایه‌تیی سووریا و پارێزگاری له‌ ئاسایشی نه‌ته‌وه‌یی توركیا دووپات كرده‌وه‌.

2- جه‌ختیان كرده‌وه‌ له‌سه‌ر هه‌وڵه‌كانیان بۆ به‌ره‌نگاربوونه‌وه‌ی تیرۆر به‌ هه‌موو شێوه‌ و رووخساره‌كانی و په‌كخستنی پلانی جیاخوازیی له‌ خاكی سووریا.

3- له‌و چوارچێوه‌یه‌دا، ئه‌و ره‌وشه‌ی له‌ ناوچه‌ی ئۆپه‌راسیۆنی توركیا "كانی ئاشتی"  هاتووه‌ته‌ ئاراوه‌ ده‌پارێزرێت، كه‌ ئێستا ناوچه‌كانی گرێ سپی و سه‌رێ كانی به‌ قوڵیی 32 كیلۆمه‌تر گرتووه‌ته‌وه‌.

4- هه‌ردوولا جه‌ختیان له‌سه‌ر بایه‌خی رێككه‌وتنی ئه‌ده‌نه‌ كرده‌وه، رووسیا كارئاسانیی بۆ جێبه‌جێكردنی رێككه‌وتنه‌كه‌ له‌ ره‌وشی ئێستادا ده‌كات.

5- له‌ كاتژێر 12:00ی نیوه‌ڕۆی رۆژی 23ی ئۆكتۆبه‌ری 2019ه‌وه‌ پۆلیسی سه‌ربازیی رووسیا و پاسه‌وانی سنووری سووریا له‌ دیوی سووریا له‌ ناوچه‌ی سنووریی نێوان توركیا و سووریا و له‌ ده‌ره‌وه‌ی ناوچه‌ی ئۆپه‌راسیۆنی "كانی ئاشتی" ده‌بێت بۆ كارئاسانیی گواستنه‌وه‌ی یه‌كینه‌كانی پاراستنی گه‌ل و چه‌كه‌كانیان بۆ قوڵایی 30 كیلۆمه‌تر له‌ دووری سنووری سووریا، پێویسته‌ ئه‌و پرۆسه‌یه‌ له‌ ماوه‌ی 150 كاتژمێردا كۆتایی بێت. له‌و چركه‌ساته‌وه‌، ده‌ورییه‌ی هاوبه‌شی رووسیا و توركیا له‌ خۆرئاوا و خۆرهه‌ڵاتی ناوچه‌ی ئۆپه‌راسیۆنی "كانی ئاشتی" به‌ قوڵیی 10 كیلۆمه‌تر جگه‌ له‌ شاری قامیشلۆ، له‌ ئه‌ركدا ده‌بن.

6- سه‌رجه‌م چه‌كدارانی یه‌كینه‌كانی پاراستنی گه‌ل و چه‌كه‌كانیان له‌ منبج و ته‌ل ره‌فعه‌ت دوور ده‌خرێنه‌وه‌.

7- هه‌ردوولا رێككاری پێویست بۆ رێگرتن له‌ دزه‌كردنی تیرۆریستان ده‌گرنه‌ به‌ر.

8- هه‌وڵی هاوبه‌ش ده‌خرێنه‌ گه‌ڕ بۆ كارئاسانیی به‌ مه‌به‌ستی گه‌ڕانه‌وه‌ی ئاره‌زوومه‌ندانه‌ و سه‌لامه‌تی په‌نابه‌ران.

9- ئالیه‌تی هاوبه‌ش بۆ چاودێریكردن و به‌دواداچوونی سه‌رپه‌رشتی و جێبه‌جێكردنی ئه‌و یاداشته‌ و هه‌ماهه‌نگیی داده‌نرێت.

10- هه‌ردوولا كار بۆ دۆزینه‌وه‌ی چاره‌سه‌رێكی سیاسیی هه‌میشه‌یی بۆ قه‌یرانی سووریا ده‌كه‌ن له‌ چوارچێوه‌ی ئالیه‌تی رێككه‌وتنه‌كانی ئه‌ستانه‌ و پشتیوانیكردنی چالاكییه‌كانی لیژنه‌ی ده‌ستووریی.