دیاردەیەكی گەردوونی روو دەدات و لە كوردستان دەبینرێت
K24 - ھەولێر
سبەی شەو دیاردەی مانگ گیران روو دەدات و لە ھەرێمی كوردستان و چەندین وڵاتێك ئەو دیاردەیە دەبینرێت، ماوەی مانگ گیرانەكە 5 كاتژمێر دەخایەنێت.
رێبەر رۆستەم، سەرۆكی یەكێتی فەلەكناسی عەرەبی - ئەفریقی لقی كوردستان بە كوردستان24ی راگەیاند: "سبەی شەو دیاردەی مانگ گیران روودەدات و لە ھەرێمی كوردستان ئەو دیاردەیە دەبینرێت زیاتر لە پێنج كاتژمێر دەخایەنێت".
گوتیشی: "مانگ گیرانەكە لە كاتژمێر 9:44 شەو دەست پێدەكات و مانگ دەچێتە ناو نیمچە سێبەری زەوی لە كاتژمێر 11 مانگ دەچێتە ناوسێبەری زەوی و دوای 5 خولەك دیاردەكە بە روونی دەبینرێت. لە كاتژمێر 2ی بەرەبەیانی رۆژی چوارشەممە مانگ وردە وردە لەناو سێبەری زەوی دەچێتە دەرەوە. دیاردەكە لەسەرەتاوە تا كۆتایی 5:38 خولەك دەخایەنێت، بەڵام تەنھا سێ كاتژمێر بە چاو دەبینرێت".
ئەو فەلەكناسە روونیكردەوە: "دیاردەكە لە زۆربەی وڵاتان دەبینرێت، لەوكاتە روودەدات كە مانگ پڕە و پێی دەگوترێ مانگی بەدر".
رێبەر رۆستەم، ئەوەشی خستەڕوو: "لەمساڵدا ھیچ دیاردەیەكی مانگ گیران روونادات تا ساڵی 2020".
ھ.م