لەبارەی گۆڕینی تابلۆی ئۆتۆمبێلی شارەكانی ھەرێمی كوردستان بڕیارێكی نوێ دەدرێت

K24 - بەغدا

شڤان جەباری، پەیامنێری كوردستان24 لە بەغدا رایگەیاند: "بەڕێوەبەرایەتی ھاتووچۆی بەغدا بڕیارێكی نوێی لەبارەی تابلۆی ئۆتۆمبێلی شارەكانی ھەرێمی كوردستان دا، بەپێی بڕیارەكە لەمەودوا ھاووڵاتیانی شارەكانی دیكەی عێراق، ئۆتۆمبێلەكەیان كە تابلۆی شارەكانی ھەرێمی كوردستان بێت ناتوانن بیگۆڕن بۆ تابلۆی شارەكانی دیكەی عێراق".

عەمید عەمار وەلید، بەڕێوبەری راگەیاندنی هاتووچۆی بەغدا بە كوردستان24ی گوت: "ئەو بڕیارە لەچوارچێوەی بڕیاری ژمارە 68 دایە، بۆ گۆڕینی خاوەندارییەتی ئۆتۆمبێل، جاران بە وەكالە ئەو ھاووڵاتیانەی لە ھەرێمی كوردستان دەژین دەیانتوانی تابلۆی ئۆتۆمبێلەكانیان لە شارەكانی ھەرێمی كوردستانەوە بگۆڕن بۆ تابلۆی شارەكانی دیكەی عێراق، بەڵام ھەندێك كێشەی یاسایی و ئەمنی دروست دەكرد، بۆیە بڕیاردرا كە لە ھەرێمی كوردستان ئەو ئۆتۆمبێلانە بەناوی خۆیان بكەن، نەك ئەو مامەڵانە لە بەغدا بكرێن، ئێستا مامەڵەی گۆڕینی تابلۆ لە بەغدا راگیراوە بەھۆی ئەو قەرەباڵغیەی لە بەڕێوەبەرایەی ھاتووچۆی بەغدا ھەیە".

گوتیشی: "ئێمە لاریمان نییە لەوەی ھەر ھاووڵاتییەك خەڵكی بەغدا و بەسرا و شارەكانی دیكەی عێراق بێت و بچن لە ھەرێمی كوردستان ئۆتۆمبێل بەناوی خۆیان بكەن، بەڵكو ئێمە كێشەمان لەگەڵ گواستنەوە و گۆڕینی تابلۆ ھەیە لە شارەكانی ھەرێمی كوردستانەوە بۆ بەغدا".

ھ.م