چەند خۆپیشاندەرێکی دیکە لە عێراق کوژران

K24 – هه‌ولێر:

خۆپیشاندان لە شارەکانی عێراق بەردەوامە و 14 خۆپیشاندەری دیکەش لە بەغدا کوژران.

هەرچەندە حکومەت و پەرلەمانی عێراق هەنگاوی باشییان بە ئاڕاستەی  جێبەجێکردنی داواکارییەکانی خۆپیشاندەران  و کۆمەڵێک چاکسازی گشتی ناوە، بەڵام خەڵکی ناڕازی لەسەر خۆپیشاندانەکانیان بەردەوامن.

بەگوێرەی هەندێک سەرچاوە 14 خۆپیشاندەری دیکە لە نزیک پردی ئەحرار کوژراون و 78 کەسی دیکەش برینداربوون.

لە بەرامبەردا، عەبدولکەریم خەڵەف گوتەبێژی سەربازی سەرۆک وەزیران، رەتیکردەوە هیچ کەسێک کوژرابێت.

وەک شایەتحاڵەکان دەڵێن، خۆپیشاندەران لە پردەکە بەرەو ناوچەی سەوز پەڕیونەتەوە، بەڵام هێزە ئەمنییەکان بە گوللە و بۆمبی گازی بەرەو روویان بوونەتەوە و خۆپیشاندەرانیش پاشەکشەیان کردووە.

خوێندکارێکی کۆلیژی پزیشکی لە ناو خۆپیشاندەران رایگەیاند: "" کاتژمێر یەک و نیوی دوای نیوەشەو، لە سەر پردی ئەحرار، بە هۆی تەقە و بۆمبی گازییەوە، چەند شەهید و بریندارێک کەوتنەوە، هەروەها حاڵەتی هەناسە تەنگیش هەبوو، بۆمبی دەنگیش بەکارهاتبوو ".

لەلای خۆشییەوە، كۆمسیۆنی مافەكانی مرۆڤ لە عێراق ئاشکرایکرد، لەماوەی چوار رۆژدا نۆكەس كوژراون، شەشیان  لە بەغدا، سێ لە زیقار و خۆپیشاندەرێك لە بەسرە، هاوکات، 135 کەسی دیکەش برینداربوون.

لە سەرەتای مانگی تشرینی یەكەمی رابردوو، شەپۆلی یەکەمی خۆپیشاندانەکان بەغدا و شارەكانی ناوەڕاست و باشووری عێراقی گرتەوە، لە 20ی هەمان مانگیش شەپۆلی دووەم دەستیپێکرد و بەهۆی دروستبوونی پێكداهەڵپژانی نێوان خۆپیشاندەران و هێزە ئەمنییەكانیش، تا ئێستا سەدان كەس كوژران و هەزارانی تریش برینداربوون.

H.J