به‌ ڤیدیۆ.. فڕۆكه‌خانه‌ی نه‌جه‌ف له‌لایه‌ن خۆپیشانده‌رانه‌وه‌ كۆنتڕۆڵ كرا

گشته‌كانی فڕۆكه‌خانه‌كه‌ راوه‌ستاون
kurdistan24.net

K24 - هه‌ولێر:

خۆپیشانده‌ران له‌ پارێزگای نه‌جه‌ف، هه‌ڵیانكوتایه‌ سه‌ر فڕۆكه‌خانه‌ی نێوده‌وڵه‌تی شاره‌كه‌ و كۆنتڕۆڵیان كرد.

به‌ گوێره‌ی ئه‌و گرته‌ ڤیدیۆییانه‌ی ده‌ست كوردستان 24 كه‌وتوون، خۆپیشانده‌رانی نه‌جه‌ف، هه‌ڵیانكوتایه‌ سه‌ر فڕۆكه‌خانه‌ی نێوده‌وڵه‌تی نه‌جه‌ف و كۆنتڕۆڵیان كرد.

وه‌ك له‌و گرته‌ ڤیدیۆییانه‌دا ده‌رده‌كه‌وێت، خۆپیشانده‌ران به‌ ئاڵای عێراقه‌وه‌ رژاونه‌ته‌ ناو فڕۆكه‌خانه‌ و هیچ هێزێكی ئه‌منیش بۆ پاراستنی شوێنه‌كه‌ نه‌ماون و چۆڵیان كردووه‌.

به‌ گوێره‌ی هه‌واڵێكی وێبسایتی سكای نیوزی ئیماراتیش، خۆپیشانده‌ران فڕۆكه‌خانه‌كه‌یان كۆنتڕۆڵكردووه‌ و گه‌یشتوونه‌ته‌ دوایین خاڵی پشكنین و چوونه‌ته‌ سه‌ر فڕگه‌ی هه‌ڵفڕینی فڕۆكه‌.

وه‌ك وێبسایته‌كه‌ ئاماژه‌ی بۆ كردووه‌، له‌ ئێستادا به‌ هۆی كۆنتڕۆڵكردنی فڕۆكه‌خانه‌كه‌ له‌لایه‌ن خۆپیشانده‌رانه‌وه‌، گه‌شته‌كانی فڕۆكه‌خانه‌ش راگیراون.

به‌هۆی نه‌بوونی كاره‌با، ئاوی پاكی خواردنه‌وه‌ و به‌رزبوونه‌وه‌ی رێژه‌ی بێكاری له‌ پارێزگاكانی باشووری عێراق، ماوه‌ی پێنج رۆژه‌ خۆپیشاندانه‌كان ده‌ستییان پێكردووه‌.

ئه‌مڕۆش له‌ هه‌ریه‌ك له‌ پارێزگاكانی نه‌جه‌ف، كه‌ربه‌لا، بابل، میسان، زیقار و به‌سڕه‌ خۆپیشاندان به‌ڕێوه‌چوو.

ا. م